पुणे : कंपनीत कामाच्या वेळी इतरत्र फिरणार्‍याला 'तुला कंपनीने दिलेले काम करुन घे', असे म्हटल्याने चौघांनी मालकाच्याच डोक्यात कोयत्याने मारून लाकडी स्टंप व बांबुने मारहाण केली. ही घटना नर्‍हे येथील भंडारी भोसले इंडस्ट्रीज भंगार दुकानासमोर ४ जून रोजी रात्री ९ वाजता घडली.
याप्रकरणी सिंहगड रोड पोलिसांनी रोहित चौगुले (वय २१) आणि तुषार चव्हाण (वय २१, दोघे रा. नर्‍हे) यांना अटक केली असून त्यांच्या साथीदारांवर गुन्हा दाखल केला आहे.
याबाबत संदीप नाईक (वय ४३, रा. नर्‍हे) यांनी फिर्याद दिली आहे. नाईक यांच्या कंपनीत कामाच्या वेळी तुषार चव्हाण हा इतरत्र फिरत असल्याचे दिसले. त्यावेळी नाईक यांनी त्यास तु नाष्टा व चहा करुन तुला दिलेले काम करुन घे, असे सांगितले. यावरुन राग येऊन तुषार चव्हाण व इतरांनी मिळून नाईक यांना मारहाण केली. तुषार याने त्याच्याकडील कोयता नाईक यांच्या डोक्यात मारला. इतरांनी लाकडी स्टंप व बांबुने नाईक यांच्या डोक्यात, हातावर व पाठीवर मारुन गंभीर जखमी केले. पोलीस उपनिरीक्षक नितीन जाधव अधिक तपास करीत आहेत.