'तुकारामला का मारतोस', चुलता अडवायला आला, पुतण्याने थेट रॉड छातीत भोसकला

सख्ख्या चुलत भावाला मारण्यासाठी आलेल्या पुतण्याला अडवण्यासाठी चुलते मध्ये आले होते

शेलपिंपळगाव (पुणे) : घरगुती वादातून पुतण्याकडून चुलत्याचा लोखंडी रॉड छातीत भोसकून निर्घृण खून झाल्याची धक्कादायक घटना समोर आली आहे. चाकण शिक्रापूर रस्त्यावर बहुळ (ता. खेड) गावच्या हद्दीतील पानसरेवस्ती येथे शुक्रवारी (दि. ६ जून) सकाळी साडेआठच्या सुमारास घडली. दत्तात्रय बाबुराव पानसरे (वय ६२, रा. पानसरेवस्ती, बहुळ) असे खून झालेल्या इसमाचे नाव आहे. तर दशरथ गुलाब पानसरे (रा. बहुळ) याला चाकणपोलिसांनी अटक केली आहे. याप्रकरणी तुकाराम दत्तात्रय पानसरे यांनी चाकण पोलिस ठाण्यात फिर्याद दिली आहे. 

     पोलिसांनी दिलेल्या माहितीनुसार, बहुळ (ता. खेड) येथे घरगुती वादातून दशरथ गुलाब पानसरे याने त्याचा सख्खा चुलत भाऊ तुकाराम दत्तात्रय पानसरे यास जीवे ठार मारण्याच्या उद्देशाने लोखंडी रॉड छातीत भोसकण्याचा प्रयत्न केला. तो तुकाराम यांनी अडवला. त्यामध्ये त्याच्या हाताला गंभीर दुखापत झाली. त्यानंतर, तुकारामचे वडील दत्तात्रेय पानसरे हेही 'तुकारामला का मारतोस, अशी विचारणा करण्यासाठी पुढे आले असता, आरोपी दशरथ याने त्यांच्या छातीत लोखंडी रॉड भोकसून त्यांना जीवे ठार मारले.