ससूनमध्ये ‘सोनोग्राफी’चा विनापरवाना वापर

राज्य शासनाचे रुग्णालय असलेल्या ससूनमध्ये ६ वर्षांपासून विनापरवाना सोनोग्राफी मशिन वापरण्यात येत असल्याची धक्कादायक माहिती समोर आली आहे.

पुणे : राज्य शासनाचे रुग्णालय असलेल्या ससूनमध्ये ६ वर्षांपासून विनापरवाना सोनोग्राफी मशिन वापरण्यात येत असल्याची धक्कादायक माहिती समोर आली आहे. पुणे महापालिकेच्या पीसीपीएनडीटी सेलने ससूनची तपासणी करून मशिन सील केली असून, कारणे दाखवा नोटीस बजावली आहे. एकीकडे राज्यात स्त्रीभ्रूणहत्येची प्रकरणे समोर येत असताना शासकीय रुग्णालयातच विनापरवाना सोनोग्राफी मशिन वापरण्यात येत असल्याने शासनच स्त्रीभ्रूणहत्येप्रकरणी संवेदनशील नसल्याचे स्पष्ट झाले आहे.ससूनच्या नेत्रविकार विभागात रुग्णांच्या डोळे तपासणीसाठी ‘ए स्कॅन’ ही सोनोग्राफी मशिन वापरली जाती होती. सन २००९पासून ही सोनोग्राफी मशिन वापरण्यात येत होती. नवे सोनोग्राफी मशिन घेतल्यानंतर त्याची नोंदणी तेथील स्थानिक स्वराज्य संस्थेमध्ये करणे कायद्याने बंधनकारक आहे. असे असतानाही ससूनमध्ये २००९ पासून ही मशिन विनापरवाना वापरण्यात येत होती. याबाबतची माहिती पालिकेच्या पीसीपीएनडीटी सेलला समजल्यानंतर तेथील अधिकाऱ्यांनी २३ मार्चला सायंकाळी साडेसातच्या सुमारास ससूनमध्ये तपासणी केली. रात्री सव्वाबाराच्या सुमारास संबंधित सोनोग्राफी मशिन सील करण्यात आली. स्त्रीभ्रूणहत्या रोखण्यासाठी गर्भलिंग परीक्षण प्रतिबंध कायदा (पीसीपीएनडीटी अ‍ॅक्ट) आणण्यात आला. मात्र, त्यानंतरही खासगी स्तरावर छुप्या पद्धतीने गर्भलिंगनिदान केले जात असल्याचे समोर येत आहे. पहिल्यांदाच शासकीय रुग्णालयात विनापरवाना सोनोग्राफी मशिन वापरण्यात येत असल्याची माहिती समोर आली आहे.खासगी रुग्णालयांमध्ये सोनोग्राफी मशीनचा गैरवापर होत असल्याचे अनेकदा उघडकीस आले आहे. त्यानंतरच स्त्रीभ्रूणहत्या रोखण्यासाठी पीसीपीएनडीटी कायदा करण्यात आला आहे. तरीही हा प्रकार समोर आला आहे.पालिकेकडे सोनोग्राफी मशिनची नोंदणी बंधनकारक आहे. ससून रुग्णालयात विनापरवाना सोनोग्राफी मशिन वापरण्यात येत असल्याची माहिती आमच्या पीसीपीएनडीटी सेलला कळाली होती. त्यानुसार त्यांनी तपासणी करून कारवाई केली आणि मशिन सील केली आहे. त्यासंदर्भात त्यांना नोटिसही पाठविण्यात आली आहे.- कुणाल कुमार,आयुक्त, पुणे महापालिकाससून रुग्णालयाच्या नेत्रविकार विभागात ‘ए स्कॅन’ नावाची मशिन रुग्णांचे डोळे तपासणी करण्यासाठी वापरली जात होती. त्यातून केवळ स्कॅन केले जात होते. ती मशिन सोनोग्राफी असल्याचे माहिती नव्हते. त्यामुळे आम्ही त्याची नोंदणी केली नाही. परंतु त्याची माहिती कळताच आम्हीच पुणे महापालिकेशी संपर्क साधून याची माहिती दिली.- डॉ. अजय चंदनवाले, अधिष्ठाता, ससून रुग्णालय