पुणे: सोशल मीडियावर मुलींच्या नावाने चॅटीग करुन तरुण मुलांना जाळ्यात ओढायचे. त्यांच्याबरोबर व्हिडिओ कॉलिंग करुन त्यांना अर्धनग्न होण्यास सांगून त्याचे स्क्रीन शॉट काढून ब्लॅकमेक करायचे असे प्रकार वाढले आहेत. या त्रासाला कंटाळून दत्तवाडी भागातील युवकाने इमारतीवरुन उडी मारुन आत्महत्या केल्याचा धक्कादायक प्रकार समोर आला आहे. धनकवडी आणि दत्तवाडी येथे अशा दोन घटना घडल्या आहेत. शंतनू (वय १९) असे या आत्महत्या केलेल्या युवकाचे नाव आहे.
याप्रकरणी त्याच्या भावाने दत्तवाडी पोलीस ठाण्यात फिर्याद दिली आहे. हा प्रकार दत्तवाडीमधील एका सोसायटीत २८ सप्टेबर रोजी दुपारी घडला होता. अशीच एक घटना धनकवडीमध्ये ३० सप्टेबर रोजी घडली होती.
याबाबत पोलिसांनी दिलेल्या माहितीनुसार, फिर्यादी यांचा भाऊ इंस्टाग्राम आयडीवरुन एका अनोळखी प्रित यादव नावाच्या आयडीवर चॅटींग करीत होता. त्यांच्या भावाचे अर्ध नग्न फोटो तिने पाठविण्यास सांगितले. हे फोटो व्हायरल करण्याची धमकी देऊन तिने त्याच्याकडून १ हजार ९०० रुपये, १ हजार ६०० रुपये आणि १ हजार रुपये असे ४ हजार ५०० रुपये फोन पे वरुन घेतले होते. त्यानंतरही धमकी देऊन वारंवार पैशांची मागणी केली जात होती. तसेच त्याचे फोटो व्हायरल केल्याने शंतनू याने २८ सप्टेंबर रोजी घराच्या इमारतीवरुन खाली उडी मारुन आत्महत्या केली. फिर्यादी यांनी अंत्यसंस्कार व सर्व विधी केल्यानंतर बुधवारी याबाबत फिर्याद दिल्यानंतर गुन्हा दाखल करण्यात आला आहे.
ऑनलाइन ओळख झालेल्या तरुणीने तरुणाचा नग्नावस्थेतील व्हिडिओ सोशल मीडियावर अपलोड करण्याची धमकी देत सातत्याने खंडणीची मागणी केल्याने धनकवडी येथील एका तरुणाने ३० सप्टेबर रोजी राहत्या घरात गळफास घेऊन आत्महत्या केली होती. अमोल यानेही या तरुणीच्या धमकावणीनंतर तिला साडेचार हजार रुपये पाठविले होते. तिच्या सततच्या त्रासामुळे अमोल याने तिला ‘‘मै सुसाईड क रहा हू’’ असा संदेश पाठविला होता. त्यावर तिने ‘‘करो सुसाईड मै सोशल मीडियावर व्हीडिओ व्हायरल कर रही हू ’’अशी धमकी दिली. त्यानंतर त्याने गळफास घेऊन आत्महत्या केली होती. सेक्स टॉर्शन चा हा प्रकार वाढत असून त्याला अनेक तरुण बळी पडत आहेत. मात्र, बदनामीच्या भितीने कोणी सांगत नाहीत. त्याचा कडेलोट झाल्यानंतर प्रकार समोर आहे.