पुणे: लग्नाचे आमिष दाखवून अल्पवयीन मुलीवर बलात्कार केल्याच्या दोन वेगवगेळ्या घटना घडल्या आहेत. यातून पीडित मुली गरोदर राहिल्यानंतर हा प्रकार समोर आला आहे. याप्रकरणी दोन अल्पवयीन मुलांवर पोक्सो कायद्यांतर्गत गुन्हा दाखल केला आहे.
पहिल्या प्रकरणात, १७ वर्षीय पीडित अल्पवयीन मुलीने बुधवारी (दि. ८) कोथरूड पोलिस ठाण्यात फिर्याद दिली आहे. यावरून एकावर बलात्कारासह पोक्सो कायद्यांतर्गत गुन्हा दाखल केला आहे. पोलिसांनी दिलेल्या माहितीनुसार, पीडित मुलगी आणि आरोपी एकमेकांचे मित्र आहेत. आरोपीने पीडितेला त्याच्या घरात बोलवून लग्नाचे आमिष दाखवले. त्यानंतर आरोपीने तिच्यासोबत वारंवार शारीरिक संबंध प्रस्थापित केले. यातून मुलगी गर्भवती राहिल्याने हा प्रकार समोर आला. पीडित मुलीने दिलेल्या तक्रारीवरुन पोलिसांनी आरोपीवर गुन्हा दाखल केला आहे. याप्रकरणाचा पुढील तपास पोलिस उपनिरीक्षक सूळ करत आहेत.
दुसऱ्या प्रकरणात, सिंहगडरोड परिसरात राहणाऱ्या एका १६ वर्षाच्या मुलीने फिर्याद दिली आहे. त्यानुसार एका १७ वर्षीय अल्पवयीन मुलावर गुन्हा दाखल करण्यात आला आहे. आरोपी आणि पीडित हे एकमेकांच्या परिचयाचे आहेत. आरोपीने अल्पवयीन मुलीसोबत मैत्री करून तिचे राहते घरी येऊन शारीरिक संबंध प्रस्थापित केले. पीडित मुलगी गर्भवती राहिल्याने हा प्रकार समोर आला आहे.