बारामती: अपघाताचे दृश्य पाहिल्यानंतर मन सुन्न झाले आहे. विमानाचे तुकडे इतक्या भीषण अवस्थेत पडले होते की या अपघातात माणसांचे काय झाले असेल, याचा विचारही करवत नाही, अशी भावना राष्ट्रवादी काँग्रेसचे ज्येष्ठ नेते छगन भुजबळ यांनी व्यक्त केली.
भुजबळ यांनी आज अपघातस्थळी पाहणी केली. यावेळी बोलताना ते म्हणाले की, धावपट्टी चांगली असतानाही धावपट्टीपासून अवघ्या २५ ते ३० फूट अंतरावर विमान धडकल्याने हा अपघात झाला असावा, असे प्रथमदर्शनी वाटते. धावपट्टीपासून लांब आणि सुमारे ५० फूट खोल विमान कोसळले आहे. नेमकी चूक कुणाची होती, विमानात तांत्रिक बिघाड होता की वैमानिकांकडून काही चूक झाली, याची सखोल चौकशी होणे गरजेचे आहे.
या अपघातात पवार कुटुंबाची अपूरणीय हानी झाली असून राष्ट्रवादी काँग्रेस पक्षाच्या कार्यकर्त्यांनाही मोठा धक्का बसला आहे, असे भुजबळ म्हणाले. “कालच अजित पवार यांच्यासोबत जवळपास दोन तास चर्चा झाली होती. ती चर्चा नेहमीप्रमाणेच होती. गेली ३५ वर्षे आम्ही एकत्र काम करत होतो. अजित पवार आता भेटणार नाहीत, यावर अजूनही विश्वास बसत नाही,” अशा शब्दांत त्यांनी आपल्या भावना व्यक्त केल्या.
अपघाताच्या चौकशीबाबत बोलताना भुजबळ म्हणाले की, वेगळी मागणी करण्याची गरज नाही. संबंधित सर्व विभागांकडून ही चौकशी आपोआपच केली जाईल. विमान अपघातासंदर्भातील सर्व बाबी तपासून सत्य समोर येईल, असा विश्वासही त्यांनी व्यक्त केला.
Web Summary : Chhagan Bhujbal demands thorough investigation into the Baramati plane crash, questioning technical failure or pilot error. He visited the crash site and expressed grief over the irreparable loss to the Pawar family and party workers, recalling his long association with Ajit Pawar.
Web Summary : छगन भुजबल ने बारामती विमान दुर्घटना की गहन जाँच की मांग की, तकनीकी विफलता या पायलट की त्रुटि पर सवाल उठाया। उन्होंने दुर्घटनास्थल का दौरा किया और पवार परिवार और पार्टी कार्यकर्ताओं को हुई अपूरणीय क्षति पर शोक व्यक्त किया, अजीत पवार के साथ अपने लंबे जुड़ाव को याद किया।