पुणे: महापालिकेच्या शाळेत पीटी क्लास घेण्यासाठी कंत्राटी पद्धतीने नेमलेल्या शिक्षकानेच अनेक अल्पवयीन मुलींची लैंगिक छळवणूक केल्याचा धक्कादायक प्रकार समोर आला आहे. याप्रकरणी खडक पोलिसांनी मोहंमद कय्युम अन्सारी (वय १८, रा. कोंढवा खुर्द) या शिक्षकाला अटक केली आहे. ही घटना २९ जून ते ५ जुलैदरम्यान महात्मा फुले पेठेतील एका शाळेत घडली आहे.
याबाबत शाळेच्या मुख्याध्यापकाने खडक पोलीस ठाण्यात फिर्याद दिली आहे. अधिक माहितीनुसार, महापालिकेच्या एका शाळेत मोहंमद अन्सारी याला कंत्राटी पद्धतीने पीटी क्लास घेण्यासाठी नेमण्यात आले होते. शाळेतील १२ ते १६ वर्षाच्या मुलींना पीटी शिकवताना वाईट हेतूने तो खांद्यावर, छातीवर, मांडीवर स्पर्श करीत असे. अश्लील भाषा वापरून, घाणेरड्या नजरेने पाहून मुलींची वेळोवेळी लैंगिक छळवणूक करत असे.
कोणाकडे तक्रार करायची तर करा; मी कोणाला घाबरत नाही, अशी मुलींना धमकीही देत असे. या मुलींनी मुख्याध्यापकांकडे त्याची तक्रार केली. त्याची गंभीर दखल घेऊन त्यांनी तातडीने खडक पोलिसांकडे धाव घेतली. खडक पोलिसांनी त्याला अटक केली असून, सहायक पोलीस निरीक्षक म्हस्के तपास करीत आहेत.