पुणे : जेवण नीट करीत नाही, सकाळी लवकर उठत नाही, या कारणावरून सासरी होणाऱ्या छळाला कंटाळून विवाहितेने सोमवारी सायंकाळी गळफास घेऊन आत्महत्या केली. याप्रकरणी चंदननगर पोलिसांनी पतीला अटक केली आहे.
निकीत जितेंद्र मलके (रा. समर्थनगर, भाजी मंडईजवळ,खराडी) असे अटक केलेल्या पतीचे नाव आहे. अंकिता निकीत मलके (वय ३०) असे आत्महत्या केलेल्या विवाहितेचे नाव आहे. ही घटना सोमवारी २८ मार्च रोजी सायंकाळी पाच वाजता खराडीतील समर्थनगरमध्ये घडली.
याप्रकरणी अंकिताचे वडील अशोक लक्ष्मण रावळकर (वय ६१, रा. थेरगाव) यांनी चंदननगर पोलीस ठाण्यात फिर्याद दिली आहे. त्यानुसार पोलिसांनी सासरे जितेंद्र ऊर्फ मुन्ना बादशहा मलके, संतोषी जितेंद्र मलके, निहाल मलके यांच्यावर गुन्हा दाखल करून पती निकीत मलके याला अटक केली आहे.
फिर्यादी अशोक रावळकर यांची मुलगी अंकिता हिचा दोन वर्षांपूर्वी निकीत याच्याबरोबर विवाह झाला होता. लग्नानंतर तू जेवण नीट करीत नाही. सकाळी लवकर उठत नाही, यावरून तिला सातत्याने शिवीगाळ करून छळ सुरू होता. या छळाला कंटाळून अंकिता हिने सोमवारी सायंकाळी राहत्या घरी गळफास घेऊन आत्महत्या केली. सहायक पोलीस निरीक्षक सोनवणे तपास करीत आहेत.