पुणे : शहरात भटक्या कुत्र्यांची संख्या दिवसेंदिवस वाढत असून, त्यांची सर्वत्र दहशतच पसरली आहे. काही दिवसांपर्यंत या माेकाट कुत्र्यांचा त्रास फक्त रात्रीच्या वेळी प्रवास करणाऱ्यांना हाेत हाेता. मात्र, मागील काही दिवसांत शहरात अशा काही घटना घडल्या आहेत की, ज्यामुळे भरदिवसा देखील फिरणे अवघड झाले आहे. ही भटकी कुत्री एवढी निर्ढावली आहेत की, सरळ साेसायटींच्या आवारात खेळणाऱ्या चिमुकल्यांवर दिवसाढवळ्या हल्ला करत आहेत. ग्रामीण भागात बिबट्यांची दहशत आहे, तर शहरात भटक्या कुत्र्यांनी उच्छाद मांडला आहे. शहरात जानेवारी ते नोव्हेंबर या ११ महिन्यांत तब्बल २३ हजार ३७४ नागरिकांवर कुत्र्यांनी हल्ला केला आहे. त्यानंतरही प्रशासन ठाेस कारवाई करत नाही. त्याबद्दल तीव्र नाराजी व्यक्त केली जात आहे.
आंबेगाव पठारमधील चंद्रागण सोसायटी फेज नंबर ०७ मध्ये पार्किंगमध्ये खेळत असताना समर्थ सूर्यवंशी या पाच वर्षांच्या मुलावर भटक्या कुत्र्यांनी हल्ला केला. त्यामध्ये हा मुलगा गंभीर जखमी झाला आहे. या मुलावर खासगी रुग्णालयात उपचार सुरू आहेत. या घटनेने पुन्हा एकदा पुणे शहरासह उपनगरामध्ये भटक्या कुत्र्यांचा प्रश्न ऐरणीवर आला आहे. पुणे शहरात हॉटेल्स, खाऊगल्ल्या, कचरापेट्या, मार्केट परिसरात मोठ्या प्रमाणात भटकी कुत्री आढळतात.गल्लीबोळांमध्ये समूहाने राहणारी भटकी कुत्री रात्री-अपरात्री गाड्यांवर धावून जातात. वाहनचालकाच्या पायाचा चावा घेतात. पदपथांवर चालणारी लहान मुले, ज्येष्ठ नागरिकांवर कुत्र्यांनी हल्ला केल्याच्या घटना पुढे आल्या आहेत. त्याचा नागरिकांना प्रचंड त्रास सहन करावा लागत आहे. त्यामुळे महापालिकेने तत्काळ यावर उपाययोजना करावी, अशी मागणी सातत्याने नागरिक करत आहेत.
आठ महिन्यांत ३७,४९५ कुत्र्यांवर नसबंदी
पुणे महापालिकेने २०२४ च्या एप्रिल ते नोव्हेंबर या आठ महिन्यांत ३७ हजार ४८६ भटकी आणि मोकाट कुत्री पकडून त्यांच्यावर नसबंदी शस्त्रक्रिया केली आहे. या कुत्र्यांना रेबीजचे लसीकरण करण्यात आले आहे, अशी माहिती महापालिकेच्या पशुवैद्यकीय अधिकारी डॉ. सारिका फुंडे यांनी दिली.
नागरिकांच्या झोपेचे वांदे
शहरातील भटक्या कुत्र्यांची संख्या वाढतच असून, सकाळी फिरायला जाणाऱ्या, घराबाहेर, सोसायटीत खेळणारी मुलं, रात्री उशिरा दुचाकीवर असलेल्या नागरिकांवर या भटक्या कुत्र्यांकडून होणार हल्ले वाढले आहेत. तसेच काही भागांत टोळीने राहणारी ही भटकी कुत्री रात्रीच्या वेळी प्रचंड मोठ्या व विचित्र आवाजात विव्हळल्याने नागरिकांच्या झोपेचे वांदे झाले आहेत.
उपाययोजना अपूर्ण पडत आहेत
शहराचा वाढता विस्तार, रस्त्यावर टाकला जाणार कचरा, या भटक्या कुत्र्यांवर प्रेम करून त्यांना खाऊ घालणारे नागरिक यामुळे शहरातील भटक्या कुत्र्यांची संख्या दिवसेंदिवस वाढतच आहे. या कुत्र्यांची संख्या नियंत्रित ठेवण्यासाठी महापालिकेच्या वतीने नियमितपणे या कुत्र्यांची नसबंदी करण्यात येते; परंतु भटक्या कुत्र्यांची प्रचंड संख्या लक्षात घेता या उपाययोजना खूपच अपूर्ण पडत असल्याचे स्पष्ट झाले आहे.
भटकी कुत्री चावल्याच्या घटना
२०१९ - १२ हजार २५२
२०२० - १२ हजार ७३४
२०२१ - १५ हजार ९७२
२०२२ - १६ हजार ०७७
२०२३ - २१ हजार ००२
२०२४ मध्ये कुत्र्यांनी घेतला चावा
जानेवारी : १९७३
फेब्रुवारी : २०९३
मार्च : १९६१
एप्रिल : १९२०
मे : २८३९
जून : २१९९
जुलै : २०१२
ऑगस्ट : १९३७
सप्टेंबर : २०२६
ऑक्टोबर : २१८९
नोव्हेंबर : २२२५