कारागृहामध्ये साहित्य पुरविण्यासाठी लाच मागणारा शिपाई जाळ्यात
By लोकमत न्यूज नेटवर्क | Published: November 29, 2020 04:00 AM2020-11-29T04:00:02+5:302020-11-29T04:00:02+5:30
पुणे : कारागृहामध्ये साहित्य पुरविण्यासाठी साडेचार हजार रुपयांची लाच घेणाऱ्या कारागृह शिपायाला लाच लुचपत प्रतिबंधक विभागाने सापळा रचून पकडले. ...
पुणे : कारागृहामध्ये साहित्य पुरविण्यासाठी साडेचार हजार रुपयांची लाच घेणाऱ्या कारागृह शिपायाला लाच लुचपत प्रतिबंधक विभागाने सापळा रचून पकडले.
संदीप गजानन सोळंके (वय २७, रा. येरवडा जेल वसाहत) असे या कारागृह शिपायाचे नाव आहे.
तक्रारदार यांचे दीर सध्या कारागृहात आहेत. त्यांना काही साहित्य पुरवायचे होते. त्यासाठी तक्रारदारांनी शिपाई संदीप सोळंके याच्याशी संपर्क साधला होता. तेव्हा साहित्य पुरविण्यासाठी सोळंके याने ५ हजार रुपयांची लाच मागितली होती. तक्रारदारांनी लाच लुचपत प्रतिबंधक विभागाशी संपर्क केला. त्यानंतर पडताळणीत त्याने तडजोड करुन साडेचार हजार रुपये लाच घेण्याचे मान्य केले. त्यानुसार सापळा रचून सोळंके याला लाच घेताना पकडले होते. त्याला अटक करुन न्यायालयात हजर केले असता अधिक तपासासाठी न्यायालयाने ३० नोव्हेंबरपर्यंत पोलीस कोठडी मंजूर केली. या गुन्ह्याचा तपास पोलीस निरीक्षक सुनील क्षीरसागर करीत आहेत.