पुणे : बारा वर्षाच्या अल्पवयीन मुलावर अनैसर्गिक अत्याचार करणाऱ्या तिघांनी आपल्या आणखी २ मित्रांसह एका अल्पवयीन मुलीवर सामुहिक अत्याचार केल्याचा धक्कादायक प्रकार समोर आला आहे. त्यांच्याच वस्तीत राहणार्या एका १५ वर्षाच्या मुलीवर पाच जणांनी ४ महिन्यांपूर्वी सामुहिक अत्याचार केल्याचा प्रकार हवेली पोलिसांनी केलेल्या चौकशीत उघड झाला आहे.
याप्रकरणी हवेली पोलीस ठाण्यात दोन पोस्को अंतर्गत गुन्हे नोंदविले आहेत. सहकारनगर पोलीस ठाण्याचे बीट मार्शल २० डिसेंबर रोजी तळजाई पठार येथे गस्त घालत असताना ईश्वर शिंदे (वय २०) हा संशयितास्पदरित्या फिरताना दिसला. त्याच्याकडील मोबाईलमध्ये एक व्हिडिओ क्लीप मिळाली. त्यात दोघे जण एका अल्पवयीन मुलावर अनैसर्गिक अत्याचार करीत असल्याचे दिसले. शिंदे याच्याकडे चौकशी केल्यावर त्याने हा व्हिडिओ स्वत: त्याच्या मोबाईलमध्ये रेकॉर्ड केला असून त्यातील दोघे जण व तो मुलगा परिचित असल्याचे सांगितले. त्यानंतर पोलिसांनी या मुलाच्या पालकांना या घटनेची माहिती दिली. शिंदे व त्याचे दोन साथीदार कुणाल भांगरे (वय १९), निलेश नेटके (वय २१, रा़ डोणजे) यांना ताब्यात घेतले. हा प्रकार दिवाळीच्या सुमारास घडला होता. हवेली पोलीस ठाण्याच्या हद्दीत घटना घडल्याने सहकारनगर पोलिसांनी आरोपींना हवेली पोलिसांच्या ताब्यात दिले.
हवेली पोलिसांनी केलेल्या चौकशीत या तिघांसह इतर दोघांनी एका १५ वर्षाच्या अल्पवयीन मुलीवर सामूहिक अत्याचार केल्याचा धक्कादायक प्रकार समोर आला. हा प्रकार २०२० ते सप्टेंबर २०२१ दरम्यान डोणजे येथील हॉटेल मधुबन समोरील काम बंद पडलेल्या इमारतीत व मराठी शाळेच्या बंद पडलेल्या बाथरुममध्ये घडला होता.
याबाबत पोलिसांनी दिलेल्या माहितीनुसार, ही मुलगी २०२० मध्ये आठवीत शिक्षण घेत होती. यावेळी तिच्या शाळेतील ९ वीमध्ये शिक्षण घेत असलेल्या अल्पवयीन मुलांनी तिच्याशी ओळख वाढविली. यातील एकाने तिला मधुबन हॉटेल समोरील बंद पडलेल्या इमारतीत बोलावले. तेथे तिच्यावर लैगिंक अत्याचार केला. त्यानंतर दोन ते तीन आठवड्यानंतर मराठी शाळेतील बंद पडलेल्या बाथरुममध्ये तिला बोलावून निलेश नेटके व इतर दोघांनी तिच्यावर सामुहिक अत्याचार केला. या प्रकारानंतरही त्यांनी तिच्यावर अत्याचार करण्याचा प्रयत्न केला होता. आता पोलिसांनी संपर्क साधल्यावर या मुलीने फिर्याद दिली असून हवेली पोलीस अधिक तपास करीत आहेत.