धक्कादायक ! बंद फ्लॅटमध्ये आढळला ज्येष्ठ दाम्पत्यांचा मृतदेह; पुण्यातल्या शिवाजीनगरमधील घटना

दोघांचे मृतदेह कुजलेल्या अवस्थेत असून त्यांच्या मृत्युचे नेमके कारण समजू शकले नाही...

ठळक मुद्देपोलिसांकडून अकस्मात मृत्यूची नोंद

पुणे : शिवाजीनगर गावठाण परिसरातील एका बंद फ्लॅटमध्ये ज्येष्ठ नागरिक पती पत्नीचा मृतदेह आढळून आला. संभाजी बापू शिंदे (वय ७५) आणि शोभा संभाजी शिंदे (वय ७०) अशी मृतांची नावे आहेत. ही घटना शनिवारी सायंकाळी उघडकीस आली. दोघांचे मृतदेह कुजलेल्या अवस्थेत असून त्यांच्या मृत्युचे नेमके कारण समजू शकले नाही. शिवाजीनगर पोलिसांनी अकस्मात मृत्यु झाली नोंद केली आहे. पोलिसांनी दिलेल्या माहितीनुसार, शिंदे दाम्पत्याला मुळबाळ नव्हते़ दोघेही जण गावठाणातील एका इमारतीत पहिल्या मजल्यावर रहात होते. त्यांचे नातेवाईक त्यांना भेटायला येऊन जात होते. कधी त्यांच्याशी फोनवरुन संपर्कात होते. मात्र, मागील ८ दिवसात त्यांचा फोन लागत नव्हता़ त्यामुळे शोभा शिंदे यांच्या बहिणीची मुलगी त्यांच्यासाठी जेवणाचा डबा घेऊन आज आली होती.पंरतु अनेकदा दरवाजा वाजविल्यानंतरही त्यांनी दरवाजा उघडला नाही. तेव्हा शेजारच्या मदतीने दरवाजा तोडून आत प्रवेश केल्यावर दोघेही मृतावस्थेत आढळून आले.त्यानंतर शिवाजीनगर पोलिसांना याची माहिती देण्यात आली.शिवाजीनगर पोलिसांनी त्यांचे पार्थिव शवविच्छेदनासाठी ससून रुग्णालयाला पाठविले आहे.शवविच्छेदनानंतर त्यांच्या मृत्युचे कारण समजू शकणार आहे.