सात कार्यालये हटविली

पिंपरी-चिंचवड नवनगर विकास प्राधिकरणाने अनधिकृत बांधकामावरील कारवाई दुसर्‍या दिवशीही सुरू ठेवली.

पिंपरी : पिंपरी-चिंचवड नवनगर विकास प्राधिकरणाने अनधिकृत बांधकामावरील कारवाई दुसर्‍या दिवशीही सुरू ठेवली. वाल्हेकरवाडी परिसरातील २२ एकरवरील सुमारे एक लाख ७० हजार स्क्वेअर फुटांची ७ मंगल कार्यालये भुईसपाट केली. प्राधिकरणाने वाल्हेकरवाडी, चिंचवड परिसरातील अनधिकृत मंगल कार्यालयांवर मंगळवारपासून कारवाई सुरू केली होती. काल आहेर गार्डन, माउली हॉलचे बांधकाम पाडण्यात आले. आज सकाळी सातपासून कारवाईस सुरुवात झाली. मोठा पोलीस बंदोबस्त ठेवण्यात आला होता. स्पाईन रस्त्यावरील संकल्प हॉटेलकडून चिंतामणी चौकाकडे जाणारा रस्ता, चिंचवडकडून वाल्हेकरवाडीकडे जाणारा रस्ता कै. धोंडूतात्या चिंचवडे चौकातून बंद केला होता. तर वाल्हेकरवाडी चौकातून आहेर गार्डनकडे येणारा रस्ता बंद केला होता. शीघ्र कृती दल, दंगल नियंत्रण पथकासह सुमारे साडेतीनशे पोलिसांचा बंदोबस्त तैनात केला होता. १५ एकर जागेत ही कार्यालये होती. आज आहेर लॉन्स, शुभम गार्डन असे एकूण १ लाख चौरस फुटांचे बांधकामे पाडण्यात आले. ही कारवाई उप मुख्य कार्यकारी अधिकारी कल्याण पांढरे, कार्यकारी अभियंता चंद्रकात्ां जावळे, क्षेत्रिय अधिकारी सुरेश अंभग यांच्या मार्गदर्शनाखाली झाली. त्या वेळी परिसरात चोख बंदोबस्त ठेवण्यात आला होता. त्यासाठी ३ पोकलेन, ५ जेसीबी, २ डंपर वापरण्यात आले. नवनगर विकास प्राधिकरणाने लोकसभा निवडणूक झाल्यानंतर पुन्हा एकदा कारवाई सुरू केली आहे. (प्रतिनिधी)