लोणी काळभोर : महसूल विभागाने जप्त केलेले वाळूचे दोन ट्रक दरोडा टाकून पळवून नेल्याप्रकरणी तीन वर्षापासून फरारी असलेल्या वाळूमाफियाला अकलूज ( जि.सोलापूर ) येथे स्थानिक गुन्हे अन्वेषण विभागाच्या पोलीस पथकाने जेरबंद केले आहे.
गुन्हे शाखेचे वरिष्ठ पोलीस निरीक्षक पद्माकर घनवट यांनी दिलेल्या माहितीनुसार, याप्रकरणी रमेश दगडू शिंदे ( वय ३४, रा. पानीव, ता. माळशिरस, जि. सोलापूर ) याला अटक करण्यात आली आहे. १३ मार्च २०१७ रोजी ५ वाजण्याच्या सुमारांस यवत ( ता. दौंड ) येथील शासकीय विश्रामगृहाचे परीसरात सुमारास महसूल विभागाचे कर्मचारी शहाजी मारूती भंडलकर ( रा.खामगाव ता.दौंड ) व काळुराम जगन्नाथ शेवाळे ( रा. यवत ता.दौंड ) हे तहसिलदार यांनी चोरटी वाळु वाहतुक कारवाई करून जप्त केलेल्या २१ वाहनावर देखरेखीचे शासकीय कामकाज करीत होते.
याठिकाणी रमेश शिंदे यांच्यासमवेत राजकुमार संपत पवार ( वय २७, रा. गार अकोले, ता.माढा, जि.सोलापुर ), अमोल दत्तात्रय माकर ( वय २७, रा. गोकळी, ता.इंदापुर ), कृष्णा श्रीनिवास पाटील ( वय २४, रा.पानीव ता.माळशिरस जि.सोलापुर ) व इतर दोघे यांनी संगनमत करून ट्रक चोरून नेण्याचे उद्देशाने शासकीय विश्रामगृहामध्ये आले व त्यांनी भंडलकर व शेवाळे यांना हाताने लाथाबुक्क्यांनी मारहाण करून शेवाळे यांच्या तोंडाला चिकटपट्टी लावत महसुल विभागाने जप्त केलेले १०,००,०००/- रू किमतीचे प्रत्येकी तीन ब्रास वाळुसह भरलेले दोन ट्रक नंबर एमएच.१२ एफझेड ४९५५ व एमएच १३ एएक्स ४५३८ हे वाळूसह शासकीय कामात अडथळा आणून दरोडा टाकुन पळवून नेले होते. त्याबाबत दिलेल्या तक्रारीवरून वाळू माफियांविरुद्ध दरोडयाचा गुन्हा दाखल करण्यात आलेला होता. त्यामध्ये यापूर्वी पवार, माकर व पाटील या तीन जणांना अटक करण्यात आलेली होती.
पुणे जिल्हा पोलीस अधीक्षक डॉ.अभिनव देशमुख यांचे आदेशाने रेकॉर्डवरील पाहिजे फरारी आरोपी पकडणेकामी स्थानिक गुन्हे शाखेकडून विशेष मोहिम राबवित असताना, गुन्हे शाखेचे पोलीस निरीक्षक पद्माकर घनवट यांचे मार्गदर्शनाखाली नेमलेले सहाय्यक पोलीस निरीक्षक पृथ्वीराज ताटे, पोलीस हवालदार महेश गायकवाड, निलेश कदम, सचिन गायकवाड, गुरू गायकवाड, सुभाष राऊत, अक्षय नवले यांचे पथकास २२ डिसेंबर रोजी सदर दरोडयाच्या गुन्हयातील तीन वर्षापासून पाहिजे असलेला आरोपी रमेश शिंदे हा बावडा अकलूज रोड येथे येणार असल्याची बातमी मिळाल्यावरून पथकाने त्या ठिकाणी सापळा रचून अकलूज (जि.सोलापूर) येथून तो पळून जात असताना त्याचा पाठलाग करून ताब्यात घेतलेले आहे. पुढील कारवाईसाठी त्यास यवत पोलीस ठाण्याचे ताब्यात देण्यात आलेले असून अधिक तपास यवत पोलीस स्टेशनचे पोलीस निरीक्षक भाऊसाहेब पाटील हे करीत आहेत.