पुणे: निसर्गप्रेमी संशोधक शास्त्रज्ञ माधव गाडगीळ यांनी आपले वैज्ञानिक आत्मचरित्र लिहिले आहे. सह्याचला: एक प्रेम कहाणी असे नामकरण केलेल्या या आत्मचरित्रात त्यांनी सह्याद्री पर्वतालाच आपल्या कहाणीचा विषय केले आहे. एकाचवेळी ९ भाषांमध्ये या आत्मचरित्राचे प्रकाशन १ सप्टेबरला गोखले अर्थशास्त्र संस्थेत दुपारी ४ वाजता होत आहे.
गाडगीळ यांनीच ही माहिती दिली. हे आत्मचरित्र त्यांनी स्वत: इंग्रजीत लिहीले आहे. ‘ए वॉक अप द लिव्हिंग विथ पिपल ॲन्ड नेचर’ असे त्याचे नाव आहे. त्याचे मराठीत भाषांतरही त्यांनी स्वत:च केले असून त्याचे नाव सह्याचला: एक प्रेम कहाणी असे आहे. त्याशिवाय कोंकणी, कानडी, मल्याळम, तमिळ, तेलगू, हिंदी व बंगाली या भाषांमध्येही त्याचे अनुवाद झाले आहेत. या सर्व पुस्तकांचे एकाच वेळी प्रकाशन होणार आहे. आत्मचरित्र तेही इंग्रजीतून मराठीत व त्याचा अन्य ७ भारतीय भाषांमध्ये अनुवाद असा आत्मचरित्र या साहित्यप्रकारातील एक प्रकारचा विक्रमच असेल. १ सप्टेंबरच्या प्रकाशन कार्यक्रमात आधुनिक भारताच्या राजकीय तसेच सामाजिक इतिहासाचे अभ्यासक, संशोधक व प्रसिद्ध लेखक रामचंद्र गुहा गाडगीळ यांची आत्मचरित्राच्या अनुषंगाने मुलाखत घेणार आहेत.