Pune Crime: पुणे शहर गेल्या काही दिवसांपासून गुन्हेगारीच्या विळख्यात अडकले आहे. त्यातच कोथरूड परिसरातून एक अत्यंत अंगावर काटा आणणारी घटना समोर आली. एका २३ वर्षीय तरुणाची केवळ एका अल्पवयीन मुलीशी असलेल्या मैत्रीच्या रागातून १० जणांच्या टोळीने अमानुष मारहाण करत हत्या केली आहे. नागेश संजय जाधव असे या दुर्दैवी तरुणाचे नाव असून, या घटनेने संपूर्ण शहरात खळबळ उडाली आहे.
मैत्रीचा सापळा आणि क्रूर अंत
नागेश जाधव हा शिवाजीनगर भागात ऑफिस बॉय म्हणून काम करायचा. त्याचे एका अल्पवयीन मुलीशी जुने मैत्रीचे संबंध होते, मात्र मुलीच्या घरच्यांचा या ओळखीला तीव्र विरोध होता. मृत नागेशच्या आईने केलेल्या आरोपांनुसार, हे हत्याकांड अत्यंत नियोजनबद्ध पद्धतीने करण्यात आले. संबंधित मुलीच्या मोबाईलवरूनच नागेशला मेसेज करून भेटीसाठी बोलावण्यात आले होते. आपल्या मैत्रिणीला भेटायला जातोय असं नागेशला वाटलं आणि तो कोथरूडमधील एसएनडीटी परिसरात पोहोचला. मात्र तिथे आधीच दबा धरून बसलेल्या मुलीच्या नातेवाईकांनी त्याच्यावर हल्ला चढवला.
"मारून टाकलंय, येऊन घेऊन जा"; फोनवरून दिली धमकी
१४ मार्चच्या सायंकाळी नागेश घरातून निघाला होता. रात्री ८ च्या सुमारास त्याच्याच फोनवरून आईला फोन आला, पण समोर नागेश नव्हता. आरोपींनी नागेशच्या आईला अर्वाच्च भाषेत शिवीगाळ करत, "आम्ही नागेशला मारले आहे, त्याला इथून घेऊन जा नाहीतर फेकून देऊ," अशी धमकी दिली. घाबरलेल्या आईने घटनास्थळी धाव घेतली तेव्हा नागेश रक्ताच्या थारोळ्यात पडला होता. लाकडी दांडके आणि लाथाबुक्क्यांनी त्याला इतके बेदम मारले होते की, रुग्णालयात उपचार सुरू असतानाच त्याची प्राणज्योत मालवली.
दहा जणांवर गुन्हा, संपूर्ण कुटुंब गजाआड
कोथरूड पोलिसांनी या प्रकरणी अत्यंत वेगाने तपास चक्रे फिरवून १० जणांविरुद्ध भारतीय न्याय संहिता २०२३ च्या विविध कलमान्वये गुन्हा दाखल केला आहे. यामध्ये मुलीचे आई-वडील, चुलते आणि इतर नातेवाईकांचा समावेश आहे. बबली अनिल शिंदे, सुनीता सुनील शिंदे, जयश्री लक्ष्मण शिंदे, बबली योगेश शिंदे, गंगा संजय पवार, माणिक संजय पवार, सुनील शिंदे, पप्पू शिंदे, योगेश शिंदे आणि अनिल शिंदे अशी गुन्हा दाखल झालेल्यांची नावे आहेत.
परिसरात तणावाचे वातावरण
या हत्याकांडामुळे कोथरूड आणि वडारवाडी परिसरात प्रचंड तणाव निर्माण झाला आहे. "माझ्या मुलाला मारून त्यांनी आमचा संसार उद्ध्वस्त केला, आरोपींना फाशीच व्हायला हवी," अशी मागणी नागेशच्या आईने केली आहे.
Web Summary : In Pune, a 23-year-old was brutally murdered by a 10-member gang for befriending a minor girl. The victim, lured by a message, was ambushed and fatally beaten. Police arrested the girl's family and relatives. Tension grips the area as the mother demands justice.
Web Summary : पुणे में, एक नाबालिग लड़की से दोस्ती करने पर 23 वर्षीय युवक की 10 सदस्यों के गिरोह ने बेरहमी से हत्या कर दी। संदेश द्वारा लालच देकर बुलाए गए पीड़ित पर घात लगाकर जानलेवा हमला किया गया। पुलिस ने लड़की के परिवार और रिश्तेदारों को गिरफ्तार कर लिया। मां ने न्याय की मांग की, इलाके में तनाव।