पुणे: संत तुकाराम महाराज आणि संत ज्ञानेश्वर महाराज पालखी सोहळ्याच्या काळात झालेल्या प्रचंड गर्दीचा गैरफायदा घेत महिलांचे मंगळसूत्रे आणि भाविकांचे महागडे मोबाईल फोन चोरी करणाऱ्या टोळीचा पुणे शहर गुन्हे शाखेने पर्दाफाश केला आहे. या कारवाईत सहा आरोपींना अटक करण्यात आली असून, २३ लाख ९१ हजार १३० रुपयांचा मुद्देमाल जप्त करण्यात आला आहे.
गुन्हे शाखेच्या युनिट ५ आणि ६ च्या पथकांनी ही कारवाई केली. अटक करण्यात आलेल्या आरोपींमध्ये लातूर व सोलापूर जिल्ह्यातील चार महिला आणि दोन पुरुष यांचा समावेश आहे. याशिवाय झारखंड येथील एका अल्पवयीन मुलालाही ताब्यात घेण्यात आले आहे.
जप्त मुद्देमालात काय?
पोलिसांनी केलेल्या तपासात आरोपींकडून २२.५ तोळ्यांची २० मंगळसूत्रे, १४ महागडे मोबाईल फोन जप्त करण्यात आले आहेत. एकूण जप्त ऐवजाची किंमत २३,९१,१३० रुपये असल्याचे गुन्हे शाखेचे अतिरिक्त पोलिस आयुक्त पंकज देशमुख यांनी सांगितले.
अटक केलेले आरोपी:
चांदणी कांबळे, रिटा ऊर्फ गंगा कांबळे, बबिता उपाध्ये, पूजा कांबळे (सर्व रा. उदगीर, लातूर), अरबाज शेख, गणेश जाधव (रा. सोलापूर) या आरोपींकडून हडपसर, वानवडी आणि लोणी काळभोर पोलीस ठाण्यांत दाखल सहा गुन्ह्यांचा तपास उघड झाला आहे. उर्वरित जप्त मोबाईल आणि दागिन्यांचे मूळ मालक शोधण्याचे काम सुरू आहे.
या कारवाईसाठी पोलीस उपायुक्त निखिल पिंगळे आणि सहाय्यक आयुक्त राजेंद्र मुळीक यांच्या मार्गदर्शनाखाली, पोलीस निरीक्षक वाहीद पठाण, संजय पतंगे, सहायक निरीक्षक मदन कांबळे यांच्यासह राजस शेख, नितीन मुंढे, कानिफनाथ कारखिले, प्रताप गायकवाड, विनोद शिवले, पल्लवी मोरे, स्वाती तुपे आदींनी परिश्रम घेतले.
विश्रांतवाडीत २५ संशयित ताब्यात
२० जून रोजी विश्रांतवाडी पोलीस ठाण्याच्या हद्दीत विशेष मोहिमेदरम्यान २५ संशयितांना ताब्यात घेण्यात आले. त्यापैकी १८ जणांवर भारतीय नागरिक सुरक्षा संहिता (BNSS) कलम १२८ अंतर्गत कारवाई करण्यात आली. उर्वरित अल्पवयीन असल्याने त्यांना पालकांच्या ताब्यात देण्यात आले आहे.