पुणे : राष्ट्रवादी काँग्रेस पक्षाचे तत्कालीन शहराध्यक्ष दीपक मानकर यांच्याविरोधात दोन आठवड्यांपूर्वी समर्थ पोलिस ठाण्यात गुन्हा दाखल करण्यात आला होता. बनावट दस्त तयार करून तो खरा असल्याचे भासवून सादर केल्याचा त्यांच्यावर आरोप आहे. त्यानंतर आता त्यांचा मुलगा करण मानकर आणि व्याही सुखेन सुरेशचंद्र शहा यांच्यावरही समर्थ पोलिस ठाण्यात दोन वेगवेगळे गुन्हे दाखल करण्यात आले आहेत. याप्रकरणी, समर्थ पोलिस ठाण्याचे वरिष्ठ पोलिस निरीक्षक उमेश गित्ते यांनी फिर्याद दिली आहे. त्यानुसार एका गुन्ह्यात शंतनू सॅम्यूअल कुकडे, सुखेन सुरेशचंद्र शहा, रौनक भरत जैन आणि इतर, तर दुसऱ्या गुन्ह्यात शंतनु सॅम्युअल कुकडे, करण दीपक मानकर आणि इतरांच्या विरोधात गुन्हा दाखल करण्यात आला आहे.
विदेशी तरुणीला आश्रय देण्याच्या बहाण्याने तिच्यावर सामूहिक बलात्कार केल्याप्रकरणी शंतनू कुकडे याच्यावर गुन्हा दाखल आहे. आतापर्यंत कुकडे याच्यावर समर्थ पोलिस ठाण्यात पाच गुन्हे दाखल आहेत. त्याच्या बँक खात्यात तब्बल १०० कोटी रुपयांचे व्यवहार झाले होते. कुकडेच्या बँक खात्यातून मानकर पिता-पुत्रांच्या बँक खात्यात तब्बल पावणेदोन कोटी रुपये वर्ग झाले होते, तर करण याचा सासरा सुखेन शहा याच्या बँक खात्यात तब्बल सहा कोटी ५२ लाख वर्ग झाले आहेत. त्याअनुषंगाने पुणे पोलिसांची चौकशी सुरू होती. दीपक मानकर यांनी कुकडेसोबत जमीन खरेदीच्या अनुषंगाने आर्थिक व्यवहार झाले नसल्याचे सांगत कागदपत्रे सादर केली होती. पोलिसांनी कागदपत्रांची सत्यता तपासली असता, संबंधित कागदपत्रे बनावट असल्याचे आढळून आले. दीपक मानकर यांच्यावर गुन्हा दाखल झाल्यानंतर त्यांनी शहराध्यक्ष पदाचा राजीनामा दिला. दरम्यान, बलात्कारातील आरोपी शंतनू कुकडेसोबतचे असलेले आर्थिक व्यवहार लपवल्याप्रकरणी आणि पोलिसांची दिशाभूल केल्याप्रकरणी हे गुन्हे दाखल केल्याचे वरिष्ठ पोलिस अधिकाऱ्यांनी सांगितले.
दरम्यान, गुरुवारी (दि. २९) दाखल झालेल्या गुन्ह्यात करण मानकर याने जबाबात, आपण डोणजे येथे २०२४ मध्ये दुग्ध व्यवसाय सुरू करणार होतो. तेव्हा शंतनू कुकडे हा पाच कोटी रुपये कर्ज स्वरूपात मदत देणार होता. हे कर्ज ४० वर्षांसाठी देण्यात येणार होते. त्यासाठी करारनामा दोघांच्या संमतीने केला असून, त्यातील ५० लाख कुकडेने वर्ग केल्याचे सांगितले होते. मात्र, तपासात बनावट दस्त बनवून ते खरे असल्याचे भासविल्याचे उघड झाले.
दुसरीकडे, करण मानकरचा सासरा सुखेन शहा याने जबाबात मुलगा सिद्धांत हा मुळशी येथे १० एकरवर रिसॉर्ट तयार करणार होता. त्या रिसॉर्टमध्ये गुंतवणूक म्हणून शंतनू कुकडेने ५ कोटी २२ लाख आणि रौनक जैन याने १ कोटी ३० लाख रुपये पाठवल्याचे सांगितले होते. त्यासाठी त्यांनी स्टँप पेपरवर केलेला करारनामा सादर केला होता. मात्र, तपासणीत त्यांनीही बनावट दस्त बनविल्याचे आढळले. याप्रकरणी दोन वेगवेगळे गुन्हे दाखल करण्यात आले असून, पोलिस आयुक्त अमितेश कुमार स्वतः या प्रकरणावर लक्ष ठेवून आहेत.