पुणे महापालिकेच्या अतिरिक्त आयुक्तांनी घेतले खासगी ऐवजी सरकारी रुग्णालयात उपचार

पालिकेचे अधिकारी आणि नगरसेवक सहसा इकडे उपचार घेत नाही, त्याऐवजी खासगी रुग्णालयात उपचार घेणे पसंत करतात

पुणे : पुणे महापालिकेचे अधिकारी आणि नगरसेवक पालिकेच्या रुग्णालयात उपचार घेण्याऐवजी खासगी रुग्णालयात उपचार घेतात. मात्र, पालिकेच्या अतिरिक्त आयुक्त पवनीत कौर यांनी कमला नेहरू रुग्णालयामध्ये जाऊन पाठदुखीच्या त्रासावर फिजिओथेरपीचे उपचार घेत आहेत.

पुणे महापालिकेचे ५४ दवाखाने, १९ प्रसूतीगृह आहेत. राजीव गांधी रुग्णालय, कमला नेहरू रुग्णालय आणि सोनवणे दवाखान्यामध्ये लहान मुलासांठी आयसीयू विभाग आहे. पालिकेचे कमला नेहरू हे सर्वात मोठे रुग्णालय आहे. या रुग्णालयात दरवर्षी २ लाख रुग्ण उपचार घेतात. मात्र, पालिकेचे अधिकारी आणि नगरसेवक सहसा इकडे उपचार घेत नाही. त्याऐवजी खासगी रुग्णालयात उपचार घेणे पसंत करतात. मात्र, पालिकेच्या अतिरिक्त आयुक्त पवनीत कौर यांनी कमला नेहरू रुग्णालयामध्ये जाऊन पाठदुखीच्या त्रासावर फिजिओथेरपीचे उपचार घेत आहेत. त्यासाठी शॉर्ट वेव्ह डायथर्मी, अल्ट्रासाऊंड वेव्ह्स आणि ऑस्टिओपॅथी पद्धतीचा अवलंब केला जात आहे. त्यांनी आतापर्यंत दोनदा उपचार घेतले आहेत.

डॉक्टरांचे मनोबल उंचावले

पालिकेच्या अतिरिक्त आयुक्त पवनीत कौर यांनी कमला नेहरू रुग्णालयात उपचार घेऊन चांगला पायंडा पाडला आहे. या रुग्णालयातील डॉक्टर आणि कर्मचारी यांच्यावर पवनीत कौर यांनी विश्वास दाखविला. त्यामुळे डॉक्टरांचे मनोबल उंचावले आहे.