लोणी काळभोर : व्यवसायात भागीदारी करून नफा कमवून देतो, असे आमिष दाखवून कदमवाकवस्ती येथील एका व्यावसायिकाला दोन भामट्यांनी १३ लाखांपेक्षा जास्त रुपयांचा गंडा घातल्याची घटना घडली आहे.
या प्रकरणी श्रीपाद जयवंत बळप (वय ३९, रा.ओंकार निवास, शिक्षक कॉलनी, लोणी स्टेशन, कदमवाकवस्ती, ता.हवेली) यांनी दिलेल्या फिर्यादीवरून मोईन मुन्नई खान (सध्या रा.समतानगर, कदमवाकवस्ती ता.हवेली जि.पुणे, मुळ रा.घर नंबर ७९६/७ पुराणा रसुलपूर, फिरोजाबाद, उत्तर प्रदेश) आणि अब्दुल कलीम खान फैजुल्लाखान (सध्या रा.लोणी स्टेशन, कदमवाकवस्ती ता.हवेली मूळ रा.जलाली मोहल्ला, मडगाव, जि.जळगाव) यांच्यावर गुन्हा दाखल करण्यात आला आहे. ही घटना हवेली तालुक्यातील कदमवाकवस्ती ग्रामपंचायत हद्दीत १४ जुलै २०२३ ते २० एप्रिल २०२५ या कालावधीत घडली आहे.
पोलिसांनी दिलेल्या माहितीनुसार, श्रीपाद बळप आणि मोईन खान व अब्दुल कलीम खान हे एकमेकांच्या ओळखीचे आहेत, तर आरोपी हे पोलपाट, चाळण, पिंजरे विक्रीचा होलसेल व्यवसाय करतात, तसेच बांगड्याही बनवितात. त्यांनी बळप यांना, या हस्तकला व्यवसायात खूप फायदा आहे, तुम्ही यामध्ये गुंतवणूक केली, तर तुम्हाला यामध्ये व्यवसायामध्ये भागीदारी देतो, असे सांगितले.
यावर बळप यांनी विश्वास ठेवून त्यांना चेक आणि आरटीजीएसद्वारे २० लाख ६३ हजार रुपये दिले. त्यानंतर, त्यांनी बळप यांना गुंतवणूक करण्यास सांगितले. ७ लाख ३३ हजार रुपये रक्कम परत दिली, परंतु उर्वरित १३ लाख ३० हजार रुपये दिले नाहीत. श्रीपाद बळप यांनी त्यांच्याकडे गुंतविलेल्या रकमेची मागणी केली असता, त्यांनी ती रक्कम देण्यास टाळाटाळ करून उडवाउडवीची उत्तरे दिली. आपली फसवणूक झाल्याचे लक्षात आल्यानंतर, बळप यांनी लोणी काळभोर पोलिस ठाण्यात दोघांविरोधात फसवणुकीची तक्रार दिली आहे. त्यानुसार, गुन्हा दाखल करण्यात आला आहे. पुढील तपास लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलिस उपनिरीक्षक दिगंबर सोनटक्के करीत आहेत.