पुणे : तरुणीच्या कंपनीतील तरुणामुळे ब्रेकअप झाला, असा संशय घेऊन प्रेमभंग झाल्याने तरुणाला बंदुकीचा धाक दाखवून मारहाण केल्याचा प्रकार समोर आला आहे. तुझी वाट लावण्यासाठी एक तरुणी तुझ्याविरोधात तक्रार देण्यासाठी तयार ठेवल्याचे आरोपीने सांगितले.
याबाबत फुलेनगर येथे राहणाऱ्या एका २८ वर्षांच्या तरुणाने वाघोली पोलिस ठाण्यात फिर्याद दिली आहे. त्यावरून पोलिसांनी आदर्श चौधरी (२४, रा. लोणावळा) याच्यावर गुन्हा दाखल केला आहे. ही घटना वाघोलीमधील सेंट जोसेफ कॉन्व्हेंट स्कूलच्या मोकळ्या मैदानामध्ये २१ जून रोजी रात्री साडेआठच्या सुमारास घडली.
पोलिसांनी दिलेल्या माहितीनुसार, फिर्यादी हे विमाननगर येथील एका कंपनीमध्ये नोकरीला आहेत. त्यांच्या कंपनीमधील एका तरुणीबरोबर आदर्श चौधरी याचे प्रेमसंबंध होते. एप्रिल २०२५ मध्ये या तरुणीनेच फिर्यादी यांची आदर्श चौधरीबरोबर ओळख करून दिली होती. त्यानंतर ते आदर्श याच्याबरोबर कधी बोलले नाही की भेटले नव्हते. फिर्यादी हे कंपनीत असताना आदर्श हा कंपनीच्या खाली आला असल्याचे समजल्यावर फिर्यादी यांनी फोन केला.
सायंकाळी सात वाजता कंपनीतून सुटल्यावर ते कंपनीच्या दारात भेटले. थोडा वेळ गप्पा मारल्यावर आदर्शच्या दुचाकीवरून ते वाघोली येथील सेंट जोसेफ कॉन्व्हेंट स्कूलच्या मोकळ्या मैदानामध्ये गेले. तेथे गेल्यावर आदर्श बोलू लागला. ‘माझी वाट लागली, माझे व तिचे प्रेमसंबंध संपून गेले. त्याला तू कारण आहेस. तुझ्यामुळेच सर्व काही झाले. मी आता तुझ्या आयुष्याची वाट लावणार,’ असे म्हणून फिर्यादीला लाथाबुक्क्यांनी, कंबरेच्या बेल्टने मारहाण केली. तेथेच पडलेले लाकूड उचलून त्याने पाठीत मारहाण केली.
त्यानंतर बंदूक दाखवत फिर्यादीला, ‘आम्ही तुझ्या घरचा पत्ता काढू शकतो’, असे म्हणत ‘विमाननगर पोलिस चौकीच्या बाहेर एक मुलगी उभी आहे. ती तुझ्याविरोधात खोटी तक्रार देईल व तुला अडचणीत आणेल,’ अशी धमकी देऊ लागला. त्यानंतर त्यांना तेथेच सोडून दुचाकीवरून तो निघून गेला. त्यानंतर फिर्यादी यांनी मित्राला बोलवून घेत ससून रुग्णालयात उपचार घेतले. त्यानंतर तक्रार दिली. पोलिस उपनिरीक्षक केदार पुढील तपास करत आहेत.