पुणे : आयपीएल क्रिकेट स्पर्धेत रॉयल चॅलेंजर्स बंगळुरूचा विजय झाला. यानिमित्त शहरातील डेक्कन परिसरातील गुडलक चौकात मोठ्या संख्येने आरसीबी टीमचे चाहते एकत्र येऊन त्यांनी विनापरवानगी जल्लोष केला. दरम्यान, चाहत्यांनी हुल्लडबाजी करत रस्ता अडवून धरल्याप्रकरणी डेक्कन पोलिसांनी याबाबत ३० ते ४० जणांवर गुन्हा दाखल केला आहे.
बंगळुरूने अंतिम सामना प्रथमच जिंकल्याने त्याच्या चाहत्यांनी देशभरात ठिकठिकाणी माेठ्या प्रमाणावर रस्त्यावर उतरून जल्लोष केला. अशाचप्रकारे मंगळवारी रात्री आयपीएलचा सामना संपल्यानंतर आरसीबी टीमचे समर्थक जर्सी घालून तसेच हातात झेंडे घेऊन दुचाकीवर रस्त्याने फिरत होते. एफसी रोडवरील गुडलक चौकात जल्लोष करण्यासाठी समर्थक माेठ्या संख्येने एकत्रित झाले होते. त्यांनी विजयाची घोषणाबाजी करत सार्वजनिक ठिकाणी गोंधळ घातला. रस्त्यावरील वाहनांना अडथळा होईल, अशा पद्धतीचे वर्तन करत, शांतता भंग करून फटाके फोडले.
त्यामुळे याप्रकरणी डेक्कन पाेलिसांनी ३० ते ४० जणांवर गुन्हा दाखल केला आहे. याबाबत डेक्कन पोलिस ठाण्याच्या वरिष्ठ पोलिस निरीक्षक गिरीषा निंबाळकर यांनी सांगितले की, या प्रकरणात ३० ते ४० जणांवर भारतीय न्याय संहिता २०२३ चे कलम २२३, महाराष्ट्र पोलिस कायदा कलम ३७ (१), १३५, १११, ११२ / ११७ नुसार गुन्हा दाखल करण्यात आला आहे. याप्रकरणी कोणतीही पूर्व परवानगी न घेता सार्वजनिक शांततेचा भंग करण्यात आला. याप्रकरणी सीसीटीव्ही फुटेजची पाहणी करून हुल्लडबाजी करणाऱ्या तरुणांची ओळख पटवून त्यांच्यावर पुढील कायदेशीर कारवाई केली जाणार आहे. पुढील तपास डेक्कन पोलिस करीत आहेत.