पुण्यात स्पा सेंटरवर पोलिसांचा छापा! पळ काढण्याच्या प्रयत्नात तरुणीचा मृत्यू; आणखी एक जखमी

संबंधित स्पा मध्ये देहविक्री सुरू असल्याचा संशय

किरण शिंदे, पुणे: पुण्यातील विमाननगर परिसरात रविवारी घडलेल्या एका घटनेमुळे खळबळ उडाली. ‘द रूट्स स्पा’ या स्पा सेंटरवर पोलिसांच्या कारवाई दरम्यान एका तरुणीने आणि स्पा सेंटरच्या मॅनेजरने इमारतीच्या दुसऱ्या मजल्यावरून उडी मारली. या घटनेत तरुणीचा दुर्दैवी मृत्यू झाला. तर मॅनेजर गंभीर जखमी झाला असून त्याच्यावर उपचार सुरू आहेत. पोलिसांनी दिलेल्या प्राथमिक माहितीनुसार, विमानतळ पोलिसांच्या पथकाने दुपारी सुमारे तीन वाजण्याच्या सुमारास संबंधित स्पा सेंटरवर छापा टाकला. स्पा मध्ये सुरू असलेल्या संशयास्पद प्रकारांबाबत पोलिसांना तक्रार प्राप्त झाल्यानंतर ही कारवाई करण्यात आली होती.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

कारवाईदरम्यान अटक होण्याच्या भीतीने एका तरुणीने आणि मॅनेजरने दुसऱ्या मजल्यावरील खिडकीतून उडी मारल्याचे पोलिसांनी सांगितले. उडी मारल्यानंतर दोघेही गंभीर जखमी झाले. जखमी अवस्थेत त्यांना तातडीने रुग्णालयात हलविण्यात आले; मात्र तरुणीचा उपचारापूर्वीच मृत्यू झाल्याची माहिती समोर आली. मॅनेजरच्या पायाला गंभीर दुखापत झाली असून त्याच्यावर सध्या उपचार सुरू आहेत. संबंधित स्पा मध्ये देहविक्री सुरू असल्याचा संशय व्यक्त करण्यात आला आहे. या प्रकरणी व्यवस्थापक आणि मालकाविरोधात अनैतिक मानवी व्यापार प्रतिबंधक कायद्यानुसार गुन्हा दाखल करण्याची प्रक्रिया सुरू आहे.

या घटनेबाबत माहिती देताना पोलिस उपायुक्त सोमय मुंडे यांनी सांगितले की, महिलेच्या मृत्यूची अपघाती मृत्यू म्हणून नोंद करण्यात येत आहे. तसेच स्पा सेंटरचे परवाने, कर्मचारी नोंदी आणि आर्थिक व्यवहारांची सखोल चौकशी सुरू आहे. दरम्यान घटना समजताच स्पा सेंटरच्या इमारतीभोवती मोठ्या प्रमाणावर नागरिकांची गर्दी झाली होती. पोलिसांनी तत्काळ घटनास्थळी धाव घेऊन पंचनामा केला आणि परिसरात बंदोबस्त वाढवला. सध्या या प्रकरणी स्पा सेंटरचे व्यवस्थापन, कर्मचारी तसेच अन्य संबंधित व्यक्तींची चौकशी सुरू असून, तपासाअंती पुढील कायदेशीर कारवाई करण्यात येणार असल्याचे पोलिसांनी स्पष्ट केले आहे.