पुणे : दोन गटांत झालेल्या वादात मध्यस्थी करणाऱ्या तरुणाच्या खुनाचा कट रचला होता. पण, ही बाब गुन्हे शाखेच्या युनिट एकच्या पथकाला समजल्यानंतर त्यांनी दोघांना ताब्यात घेतल्याने तरुणाच्या खुनाचा कट उधळला गेला. त्यांच्या तिसऱ्या अल्पवयीन मुलाला ताब्यात घेतले.
समीर सलीम शेख (वय १९), शाहीद फरीद शेख (वय २६, दोघे रा. कोंढवा) अशी अटक करण्यात आलेल्यांची नावे आहेत. त्यांच्याकडून कुऱ्हाड, कोयता, दोन गुप्त्या, एक तलवार असा शस्त्रसाठा जप्त करण्यात आला आहे. सलमान खान (रा. मोमिनपुरा) असे खुनाचा कट रचण्यात आलेल्या तरुणाचे नाव आहे.
याबाबत पोलिसांनी सांगितले की, अल्पवयीन मुलाची दुसऱ्या गटातील मुलांबरोबर वाद झाला होता. त्यावेळी सलमान याने मध्यस्थी करून तो मिटवला होता. त्या मुलाने नंतर आणखी एका गटासोबत वाद घातला. त्यावेळी त्याने सलमान हा आपला भाऊ असून, आपल्याला कोणी नडायचे नाही असा दम भरला. हा प्रकार सलमान याला समजल्यावर त्याने त्या मुलाला चांगलेच सुनावले. त्याचाच राग या मुलाला आला. त्याने समीर, शाहीद आणि आपल्या इतर दोघे अल्पवयीन साथीदार असे मिळून सलमान याच्या खुनाचा कट रचला.
आरोपींची धिंड...
दोघा आरोपींना अटक केल्यानंतर पोलिसांनी त्यांची धिंड काढली. ज्या परिसरात ते गुन्हा करण्यासाठी एकत्र जमले होते. तेथून पोलिसांनी त्यांना रस्त्याने फिरवले.