पुणे : उच्च न्यायालयाने बैलगाडा शर्यतीवर बंदी असतानाही बैलगाडा शर्यत आयोजित करुन तिला प्रतिबंध करणार्या पोलिसांना धक्काबुक्की करणार्या १२ जणांना भारती विद्यापीठ पोलिसांनीअटक केली आहे.
संतोष अशोक ननवरे (वय ४४, रा. गोकुळनगर, कोंढवा), योगेश बाळासाहेब रेणुसे (वय २९, रा. नेरावणे, ता. वेल्हा), मयुर दिलीप शेवाळे (वय २६, रा. शेवाळवाडी, देवाची ऊरळी), पंढरीनाथ जगन फडके (वय ५५, रा. नेरे, ता़ पनवेल), हरिश्चंद्र भागा फडके (वय ५२), पदमाकर रामदास फडके (वय ३८), ऋषीकेश सूर्यकांत कांचन (वय २३, रा. ऊरुळी कांचन), संकेत शशिकांत चोरगे (वय २१, रा. भेलकेवाडी, ता. भोर), यश राजू भिंगारे (वय १९), संतोष शिवराम कुडले (वय ४१), राहुल प्रकाश चौधरी (वय ३४, रा. वारजे) अशी अटक केलेल्यांची नावे आहेत. हा प्रकार कात्रज येथील गुजरवाडी बाबर मळा येथील डोंगराचे बाजूला असलेल्या मोकळ्या जागेवर शनिवारी सकाळी घडला.
याप्रकरणी पोलीस हवालदार रवींद्र चिप्पा यांनी फिर्याद दिली आहे. उच्च न्यायालय व राज्य शासनाने बैलगाडा शर्यतीवर बंदी घातली असतानाही पंढरीनाथ फडके यांनी एकाच्या मदतीने बैलगाडा शर्यतींचे आयोजन केले. लोकांना जमविले. बाबरमळा येथे बैलांना गाड्यांना जोडून, त्यांना निर्दययीपणे मारहाण करुन त्यांच्या शेपट्या पिरगाळून त्यांना जबरदस्तीने आरडा ओरडा करत पळवून निर्दयतेने वागवले.
त्यावेळी पोलीस आयोजक व सहभागी होणार्या इतरांना बैलगाडा शर्यती बेकायदा असल्याचे सांगत होते. तरी त्यांनी फिर्यादी पोलिसांशी वाद विवाद करुन त्यांना धक्काबुक्की केली. त्यांच्या सरकारी कामात अडथळा आणला. शर्यतीमधील एक बैल व एक छकडा असे पळवून लावले आहेत. कोरोना प्रतिबंधात्मक आदेशाचा भंग केला.