निनाद देशमुख
लोकमत न्यूज नेटवर्क
पुणे : जिल्हा परिषदेच्या सर्व शाळा तसेच खासगी शाळांतील ३ ते १४ वयोगटातील जवळपास १० लाख मुलांच्या आरोग्यावर देखरेख ठेवण्यासाठी डिजीटल हेल्थ कार्ड दिले जाणार आहे. त्या माध्यमातून त्यांची जवळच्या प्राथमिक आरोग्य केंद्रात महिन्यातून दोनदा तपासणी केली जाणार आहे. या माध्यमातून लहान मुलांमध्ये पसरलेल्या आजारांची माहिती एकत्र केली जाणार असून, त्यावर नियंत्रण मिळवण्यासाठी तज्ञ्ज डॉक्टरांची नेमणूक करण्यात येणार आहे. राज्यातील हा एकमेव असा प्रकल्प ठरणार असून साधारण मार्च महिन्यात याची सुरुवात होणार आहे.
जिल्ह्यात गेल्या वर्षी जवळपास १ हजार २२८ मुले कुपोषित आढळली होती. त्यात हवेली, खेड, इंदापूर आणि जुन्नरमध्ये सर्वाधिक कुपोषित मुले होती. यामुळे मुलांमध्ये येणाऱ्या आजारांची माहिती तसेच त्यावर उपाययोजना करण्यासोबतच त्यांना चांगल्या आरोग्य सुविधा देण्यासाठी ही डिजीटल हेल्थ कार्ड योजना राबविण्यात येणार असल्याचे मुख्य कार्यकारी अधिकारी आयुष प्रसाद यांनी लोकमतला सांगितले. यासाठी अॅप तयार करण्याचे काम सुरू आहे त्या माध्यमातून ही योजना जिल्ह्यात राबविली जाणार आहे.
जिल्ह्यातील जवळपास ३ हजारपेक्षा अधिक जिल्हा परिषदेच्या शाळा, अंगणाड्या आणि खाजगी शाळेतील मुलांना हे हेल्थ कार्ड दिले जाणार आहे. त्यांच्यावर आरोग्य सेवकांच्या माध्यमातून देखरेख ठेवली जाणार आहे. महिन्यातून दोनदा शाळेच्या पहिल्या सत्रात जवळच्या प्राथमिक आरोग्य केंद्रात, जिल्हा रूग्णालय तसेच उपजिल्हा रूग्णालयात ही तपासणी होणार आहे. यासाठी ४३० आरोग्य कर्मचाऱ्यांची मदत घेतली जाणार आहे. त्यांच्यामार्फत मुलांचे आरोग्य तपशील गोळा केले जाणार आहे. रेकॉर्ड ठेवतात आणि त्यांना आवश्यक उपचार दिले जाणार आहे. दोन महिन्यांत एकदा तरी त्यांची आरोग्य तपासणी केली जाणार आहे. ग्रामीण भागातील ग्रामीण रुग्णालये, प्राथमिक आरोग्य केंद्रे आणि उपकेंद्रांशी जोडलेले कर्मचारी व डॉक्टर यांचीही यासाठी मदत मिळणार आहे.
चौकट
विद्यार्थ्यांच्या आरोग्याचा ट्रेंड तपासण्यासाठी शासकीय वैद्यकीय महाविद्यालयांशी चर्चा
मुलांच्या आरोग्य तपासणी दरम्यान त्यांना होणाऱ्या विविध आजारांचा खुलासा होणार आहे. साधीचे आजार, त्वचारोग त्यासोबतच अनेक आजारांचा असलेल्या ट्रेंडची माहिती शोधण्यासाठी तसेच त्यानुसार उपचार पद्धती समजण्यासाठी मिळालेल्या आरोग्याच्या आकडेवारीचे विश्लेषण करून त्यानुसार उपाययोजना करण्यासाठी राज्यातील सहा शासकीय वैद्यकीय महाविद्यालयांशी चर्चा झाली आहे.
या हेल्थ कार्ड योजनेतून मुलांना होणाऱ्या विविध आजारांवर देखरेख ठेवली जाणार आहे. त्यानसुार त्यांना शास्त्रशुद्ध वैद्यकीय उपचार केले जाणार आहे. त्यांच्या आरोग्याच्या चार्टवर त्यांना उपचार दिले जाणार आहे.
जिल्ह्यातील सर्व अंगणवाडी, खासगी व शासकीय शालेय विद्यार्थ्यांना या योजनेचा लाभ मार्चच्या पहिल्या आठवड्यात देण्याची आमची अपेक्षा आहे.
- आयुष प्रसाद, मुख्य कार्यकारी अधिकारी