बारामती : ओबीसी नेते लक्ष्मण हाके यांनी उपमुख्यमंत्री अजित पवार यांच्यावर टीका केल्यानंतर बारामतीत राष्ट्रवादी काँग्रेस पक्षातील कार्यकर्ते चांगलेच संतापले आहेत. उपमुख्यमंत्री पवार यांच्या विरोधात हाके यांनी बेताल वक्तव्य थांबविण्याची मागणी करीत बारामतीत आज राष्ट्रवादीच्या पदाधिकारी, कार्यकर्ते यांनी हाके यांचा बारामतीकरांच्या वतीने जाहीर निषेध करीत हाके यांच्या प्रतिमेला जोडे मारो आंदोलन केले.
यावेळी माजी उपनगराध्यक्ष नवनाथ बल्लाळ, जिल्हा उपाध्यक्ष प्रताप पागळे, माजी नगरसेवक अमर धुमाळ, ॲड. धीरज लालबीगे, ‘छत्रपती’चे संचालक मंथन कांबळे, नीलेश टिळेकर, शहर उपाध्यक्ष नीलेश मोरे, किशोर सोलनकर, राष्ट्रवादी काँग्रेस पक्षाच्या शहर महिला अध्यक्षा अनिता गायकवाड, तालुका अध्यक्षा ज्योती लडकत, राष्ट्रवादी युवक काँग्रेस सचिव पार्थ गालिंदे, सामाजिक न्याय विभाग पुणे जिल्हा उपाध्यक्ष साधू बल्लाळ, कार्याध्यक्ष विशाल जाधव, उपसरपंच सागर देवकाते, विजया अलगी, अश्विनी तावरे, विशाल हिंगणे यासह कार्यकर्ते उपस्थित होते. राज्याचे उत्पन्न, खर्च आणि आवश्यकता बघून निधी वितरित केला जातो. एवढे प्रारंभिक ज्ञान हाके यांना नाही.
केवळ आरोप करून कोणी नेता होत नाही, हे हाके यांनी लक्षात ठेवावे. अजित पवार यांना मतदारांनी सर्वाधिक मतांनी निवडून दिले आहे. हेसुद्धा लक्षात ठेवावे. काही उलटसुलट आरोप करून जनतेमध्ये गैरसमज निर्माण केले जात असतील, तर आम्ही शांत बसणार नाही, असा इशारा समस्त बारामतीकरांनी दिला आहे. सर्व राजकीय पक्षांच्या वरिष्ठांनी यामध्ये एकच निर्णय घेतला पाहिजे. तो म्हणजे कोणीही कोणत्याही व्यक्तीने वरिष्ठ नेत्यांवर बेताल वक्तव्य करेल, खालच्या पातळीवर टीका करेल, अशा माथेफेरूंना कोणत्याच पक्षाने थारा देऊ नये. प्रताप आबा पागळे(उपाध्यक्ष पुणे जिल्हा राष्ट्रवादी काँग्रेस पक्ष) प्रा.लक्ष्मण हाके हे प्रसिद्धीसाठी हपापलेले आहेत. आमचे नेते उपमुख्यमंत्री अजित पवार यांच्यावर प्रसिद्धीसाठी खोटे आरोप केल्यास हाके यांना जशास तसे उत्तर दिले जाईल. - नवनाथ बल्लाळ (माजी उपनगराध्यक्ष, बारामती)