पुणे : चारित्र्याच्या संशयातून पत्नीचा गळा चिरून खून केल्याची घटना पिसोळी येथील पद्मावती हाइट सोसायटीत मंगळवारी पहाटे साडेतीन वाजता घडली. आरती रणजित ऊर्फ विकास झा (वय २६) असे खून झालेल्या पत्नीचे नाव आहे.
याप्रकरणी कोंढवा पोलिसांनी पती रणजित ऊर्फ विकास झा (वय ३६) याच्याविरुद्ध खुनाचा गुन्हा दाखल केला आहे. याबाबत आरतीचे काका राजेश रामक्रियापाल झा (वय ३७) यांनी फिर्याद दिली आहे. अधिक माहितीनुसार, रणजित हा मूळचा बिहारचा असून खासगी गाडीवर चालक म्हणून काम करतो. त्याची पत्नी आरती ही एका ज्वेलर्सच्या दुकानात काम करत होती. त्यांचा सहा वर्षांपूर्वी विवाह झालेला आहे. अद्याप त्यांना मूलबाळ नाही. एक महिन्यांपूर्वीच ते येथे राहतात.
रणजित आणि आरती यांच्यात सोमवारी (दि. २९) रात्री साडेदहाच्या सुमारास वाद झाला. रणजित हा आरतीच्या चारित्र्यावर संशय घेत होता. त्यावेळी फिर्यादी व त्यांच्या पत्नीने त्यांच्या घरी जाऊन वाद मिटविला होता. दरम्यान, रात्री झोपेत असतानाच रणजित याने आरतीच्या गळ्यावर चाकूने वार केले. उपचारापूर्वीच तिचा मृत्यू झाल्याचे डॉक्टरांनी सांगितले. पती रणजित ऊर्फ विकास हा फरार झाला असून, पोलिस त्याचा शोध घेत आहेत. घटनेची माहिती मिळताच पोलिस उपायुक्त स्मार्तना पाटील, विक्रांत देशमुख, सहायक पोलिस आयुक्त पोर्णिमा तावरे, वरिष्ठ पोलिस निरीक्षक संतोष सोनावणे, गुन्हे निरीक्षक संजय मोगले, संदीप भोसले यांनी भेट दिली.
मावशीच्या दारात आरती बेशुद्ध पडली
झोपेत असतानाच आरतीचा गळा चिरून पती फरार झाला हाेता. आरती राहत असलेल्या इमारतीत तिची मावशी राहते. जखमी अवस्थेत पहाटे ती मदतीसाठी त्यांच्याकडे धावली. बेल वाजवून तिने मावशी आणि काकाला उठवले. पतीने गळ्यावर चाकूने वार केल्याचे सांगितले. मात्र कारण सांगण्यापूर्वीच ती दारात कोसळून बेशुद्ध झाली.