पुणे : निवडणूक जिंकण्याचे म्हणून एक तंत्र असते. त्यावर भारतीय जनता पक्षाने हुकमत बसवली आहे. विधानसभा निवडणुकीत त्यांनी शहरातील ८ पैकी ५ जागा कायम ठेवून १ जागा जास्तीची जिंकली आहे. उर्वरित दाेन जागा प्रत्येकी एकप्रमाणे दोन्ही राष्ट्रवादी काँग्रेसला मिळाल्या आहेत. यावरून शहराच्या राजकारणातील ‘दादा’ आपणच आहोत, हे भाजपने पुन्हा एकदा सिद्ध केले आहे. त्याचवेळी काँग्रेस पक्ष मात्र पुन्हा एकदा शून्यावर राहिले आहे.
हे ठरले पुण्याचे कारभारी
शहरातील शिवाजीनगर, पर्वती, कोथरूड, खडकवासला, कॅन्टोन्मेंट या जागांवर भाजपने विद्यमान आमदारांनाच उमेदवारी दिली. त्यांच्यातील काहींना थांबवणार अशी चर्चा होती; पण भाजपने त्यांच्यावर विश्वास ठेवत पुन्हा संधी दिली. यात भाजपचे सिद्धार्थ शिरोळे, माधुरी मिसाळ, चंद्रकांत पाटील, भीमराव तापकीर, सुनील कांबळे या विद्यमान आमदारांनी पुन्हा मैदान जिंकत पक्षाचा विश्वास सार्थ ठरवला आहे. विशेष म्हणले पाेटनिवडणुकीत हातातून निसटलेला कसबा विधानसभा मतदारसंघ पुन्हा खेचून आणण्यात भाजपला यश आले आहे. हेमंत रासने यांच्या रूपाने भाजपला पुण्यात सहावा आमदार मिळाला आहे. हडपसरमध्ये राष्ट्रवादी काँग्रेस (अजित पवार) पक्षाचे चेतन तुपे हे आमदार पुन्हा निवडून आले. त्यांनी राष्ट्रवादी काँग्रेस (शरद पवार) पक्षाचे प्रशांत जगताप यांचा पराभव केला. वडगावशेरीत राष्ट्रवादी काँग्रेस (शरद पवार) पक्षाचे माजी आमदार बापू पठारे चुरशीच्या लढतीत विजयी झाले. त्यांनी राष्ट्रवादी काँग्रेस (अजित पवार) गटाचे विद्यमान आमदार सुनील टिंगरे यांना पराभूत केले.
काँग्रेस शून्यावरच
काँग्रेसला कसबा विधानसभा मतदारसंघातून यश मिळेल, याची आशा होतीच. शिवाय कॅन्टोन्मेंट आणि शिवाजीनगर या जागेवर देखील त्यांच्या उमेदवाराचा विजय हाेईल, अशी आशा हाेती. मात्र, उमेदवाराचे नाव निश्चित करण्यापासूनच पक्षात गोंधळ पाहायला मिळाला. नंतर बंडखोरी, मग गटबाजी, त्यानंतर प्रचारातील बेजबाबदारपणा या सगळ्यांचा चांगलाच धडा मतदारांनी त्यांना दिला. त्यांचे मनीष आनंद, कमल व्यवहारे, आबा बागूल हे बंडखोर फारसे चालले नाहीतच; पण अधिकृत म्हणून दिलेले उमेदवार दत्ता बहिरट, रवींद्र धंगेकर व राष्ट्रवादी काँग्रेस (शरद पवार) पक्षाच्या अश्विनी कदम हे देखील फार चालले नाहीत. चुरशीची म्हणावी अशी लढत इथे झालीच नाही. वर्ष २०१९ व २०१४ या दोन्ही विधानसभा निवडणुकांमध्ये काँग्रेस शून्यावर होती. त्यानंतर २०२३ च्या पोटनिवडणुकीत कसबा मतदारसंघातील १ जागा धंगेकर यांच्या नावाने त्यांना मिळाली हाेती. आता तीही गमावली आहे. एकूण ते पुन्हा एकदा शून्यावर आले आहेत.
दिल्लीत, राज्यात अन् लाेकल देखील भाजपच
दिल्लीत, राज्यात आणि गल्लीतही आपलीच सत्ता असावी ही प्रत्येक राजकीय पक्षाची, त्यांच्या नेत्यांची व स्थानिक कार्यकर्त्यांचीही मनीषा असते. भाजपची ती मनीषा वर्ष २०१४ पासून पूर्ण होत आहे. आताही महापालिका वगळता तसेच झाले आहे. महापालिकेची निवडणूक जाहीर झाली तर...? या विचाराने भाजप त्याची तयारी आधीपासूनच करत आहे. निवडणूक जिंकण्याचे, तीसुद्धा सार्वत्रिक निवडणूक जिंकण्याचे एक तंत्र त्यांनी विकसित केले आहे. त्याचा वापर ते काटेकोरपणे करतात. त्यांच्यात गटबाजी होत नाही, त्यांच्यात कार्यकर्ते फुटत नाहीत, त्यांच्यात सांगितलेली सर्व कामे चोख केली जातात, त्यांच्यात परस्परांमध्येच पाडापाडीचा खेळ होत नाही. हेच ते तंत्र आहे. भाजपला ते जमले आहे, काँग्रेसच काय कोणालाही ते जमत नाही. त्यामुळेच शहराच्या राजकारणात आम्हीच ‘दादा’ आहोत, हे भाजपने पुन्हा एकदा सिद्ध करून दाखवले आहे.