पुणे : गेल्या तीन दिवसांपासून कोथरूड परिसरातील कचरा डेपोतील आग धुमसत आहे. अग्निशामक विभागाच्या कर्मचाऱ्यांचे शनिवारी रात्री उशिरापर्यंत ही आग विझवण्याचे काम सुरू होते. सुमारे साडेचार एकर परिसरात आग पसरल्याने परिसरातील नागरिकांमध्ये घबराट पसरली होती.
पुणे शहर परिसरात गेल्या काही दिवसांत पावसामुळे झाडपडीच्या घटना घडल्या होत्या. तसेच पालिका प्रशासनातर्फे धोकादायक झाडांच्या फांद्या तोडण्यात आल्या आहेत. या झाडांच्या फांद्याचे ढीग कोथरूड कचरा डेपो परिसरात टाकण्यात आले. गेल्या दोन दिवसांपासून या फाद्यांच्या ढिगांना आग लागत आहे. अग्निशामक विभागाच्या कर्मचाºयांनी ही आग विझविली होती. मात्र, पुन्हा शनिवारी सकाळी ११ वाजण्याच्या सुमारास या फाद्यांना आग लागली. त्यामुळे सकाळी ११ वाजल्यापासून रात्री उशिरापर्यंत अग्निशामक विभागाच्या जवानांकडून आग विझवण्याचे काम सुरू होते.
अग्निशामक विभागाचे गजानन पाथरूडकर म्हणाले, झाडांच्या फाद्यांचे सुमारे १0 फुटांचे १५ ते २0 ढीग या ठिकाणी पडलेले आहेत. या ढिगांना दोन दिवसांपूर्वी आग लागली होती. ही आग विझविण्यात आली होती. मात्र, या परिसरात मोठ्या प्रमाणावर राख साचलेली आहे. तसेच अर्ध्या जळालेल्या फांद्यांवर माती टाकून पुन्हा त्यावर पाणी टाकावे लागते. त्यामुळे आग विझविण्यास वेळ लागत आहे. मात्र, सायंकाळी सात वाजल्यानंतर ही आग अधिकच पसरल्याचे दिसून आले.
पालिकेचे सहआयुक्त ज्ञानेश्वर मोळक यांनी दुपारी व रात्री उशिरा कचरा डेपोला लागलेल्या आगीची पाहणी केली. ही जागा मेट्रो प्रकल्पासाठी असून त्या ठिकाणी सतत आग लागत आहे. अग्निशामकचे विभागीय अधिकारी सुनील गिलबिले यांच्या मार्गदर्शनाखाली कर्मचाऱ्यांकडून आग विझविण्याचे काम सुरू होते.