पिंपरी: पाणीपुरीचे पैसे मागितल्याने हातगाडीचे नुकसान करून पाणीपुरीवाल्याला बेदम मारहाण केली. तसेच हातगाडीच्या गल्ल्यातील १ हजार १०० रुपये जबरदस्तीने काढून घेतले. कासारवाडी येथे शनिवारी सायंकाळी ही घटना घडली आहे.
याप्रकरणी मयूर पवार (वय २२), विशाल खंदारे (वय २२) व त्यांच्या सोबतचा एक अनोळखी इसम यांच्या विरोधात गुन्हा दाखल करण्यात आला आहे. करण शामलाल अहिर (वय १९, रा. राजस्थान) यांनी या प्रकरणी भोसरी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी हे पाणीपुरी विकत असताना आरोपी पाणीपुरी खाण्यासाठी आले. त्यांनी प्रत्येकी एक प्लेट पाणीपुरी खाल्ली. त्यानंतर फिर्यादीने त्यांना पैसे मागितले. कशाला पैसे मागतो, असे म्हणून शिवीगाळ करून आरोपी तेथून निघून गेले. त्यानंतर ते पुन्हा फिर्यादीच्या पाणीपुरी गाडीजवळ आले. आम्हाला पैसे मागतो का, असे म्हणून शिवीगाळ करून आरोपीने फिर्यादी ला मारहाण केली. तेच हातगाडीवर हाताने व दगडाने मारून हात गाडी चे नुकसान केले. फिर्यादीला दगड मारण्याची भीती दाखवून हातगाडीच्या गल्ल्यातील १ हजार १०० रुपये जबरदस्तीने काढून घेतले, असे फिर्यादीत नमूद आहे.