पुणे : पुण्यात जर निवडणूक होत असेल तर पुणेरी पाट्यांचा उल्लेख येणारच. याचीच प्रचिती आता कसबा पोटनिवडणुकीच्या पार्श्वभूमीवर पुन्हा समोर आली आहे. या ठिकाणी भाजपसह महाविकास आघाडीकडून जोरदार प्रचार सुरू आहे.
अवघ्या ३ दिवसांवर येऊन ठेपलेल्या कसबा विधानसभा मतदारसंघाच्या पोटनिवडणुकीसाठी सगळे पक्ष सज्ज असताना पुणेरी पाट्यांमुळे प्रचार गाजत आहे. "कोणी कितीही म्हटलं, तुमचं काम मार्गी लावतो पण सर्वांना माहितीये वेळेला फक्त रवीभाऊच धावतो! त्यामुळे आम्हाला कुठलीही अमिष दाखवू नयेत" #यंदाकसब्यातधंगेकरच" अशा पुणेरी पाट्या कसबा मतदारसंघात दिसत आहेत.
कसब्याची निवडणूक भाजपसोबत महाविकास आघाडीने गंभीरपणे घेतली आहे. त्यामुळेच या पोटनिवडणुकीच्या प्रचारासाठी सगळ्या पक्षांकडून त्यांचे मुख्य नेते, मंत्री, खासदार, आमदार प्रचारासाठी मैदानात उतरत आहेत. "येथे सोने, चांदी, पैसे इ. सर्वकाही स्वीकारले जाईल. टीप - मत मात्र रवी धंगेकरांनाच दिले जाईल!" #यंदाकसब्यातधंगेकरच" अशा मजकुराच्या पाट्याही आता कसबा मतदारसंघात दिसून आले आहेत.