पुणे : कोरोनामुळे बेरोजगारीच्या प्रमाणात वाढ झाली असून, त्यातूनच गुन्हेगारीच्या घटना वाढत आहे अशा प्रकारचे विधान एखाद्या कायदा सुव्यवस्था राखणार्या वरिष्ठ अधिकाऱ्यानेच करणे चुकीचे असल्याची भूमिका उपमुख्यमंत्री अजित पवार यांनी मांडली.
पुण्याचे नवनियुक्त पोलिस आयुक्त अमिताभ गुप्ता यांनी दोन दिवसांपूर्वीच शहरात वाढलेल्या गुन्ह्यांमागे लॉकडाऊनमुळे आलेली बेरोजगारी तसेच कारागृहातून पॅरोलवर सुटलेले गुन्हेगार असल्याचे प्रथमदर्शनी दिसत असल्याचे मत व्यक्त केले होते. याबाबत पवार यांनी कायदा सुव्यवस्था राखणार्या वरिष्ठ अधिकाऱ्यानेच अशा प्रकारचे विधान करणे चुकीचे असल्याचे स्पष्ट केले.
दरम्यान, पुणे शहरात खुन आणि इतर गुन्ह्याचे प्रमाण वाढत आहे का ? या प्रश्नावर अजित पवार म्हणाले , पुणे शहर आणि जिल्ह्यात कोरोना परिस्थितीवर प्रशासनाकडून विविध उपाययोजना केल्या जात आहे. या कामात प्रशासन, डॉक्टर, पोलीस चांगल्या प्रकारे काम करीत आहे. यामध्ये पत्रकार कोरोनाबाबत प्रत्येक वेळी नागरिकांमध्ये प्रबोधन करत आहे. ही कौतुकाची बाब आहे. पण मी आज शहरात काही ठिकाणी पाहिले. तर अद्याप ही नागरिक मास्क वापरत नाही. हे पाहून चिंता वाटत असून पोलीस विभागामार्फत मास्कचा वापर न करणार्या व्यक्तीच्या कारवाईचा आढावा आज घेतला. त्यामध्ये जिल्ह्यात तब्बल ११ कोटी रुपये जमा झाले यावरून परिस्थिती लक्षात येते.