पुणे : भरधाव डंपरने मोटारीला धडक दिल्याने झालेल्या अपघातात आजोबांसह दीड वर्षीय नातू मृत्युमुखी पडल्याची घटना पुणे-नगर रस्त्यावर घडली. अपघातानंतर डंपरचालक पसार झाला आहे.
अद्वैत अमोल कुलकर्णी (वय दीड, रा. मोशी, हवेली) आणि महेश संभुस (६०) अशी मृत्युमुखी पडलेल्यांची नावे आहेत. अपघातात नीलिमा महेश संभूस (५५) जखमी झाल्या आहेत. याबाबत दीपा कुलकर्णी (३१) यांनी लोणीकंद पोलीस ठाण्यात फिर्याद दिली आहे. हा अपघात १२ जून रोजी दुपारी चार वाजता पुणे-नगर रोडवरील ओम साई हॉटेलसमोर घडला.
दीपा त्यांचा मुलगा अद्वैत आणि आई नीलिमा आणि वडील महेश रविवारी (१२ जून) मोटारीतून पुणे-नगर रस्त्यावरून नगरकडे जात होते. महेश हे मोटार चालवित होते. नगर रस्त्यावरील ओम साई हॉटेलसमोर डंपरने मोटारीस धडक दिली. अपघातात अद्वैत, महेश गंभीर जखमी झाले. त्यांना तातडीने रुग्णालयात दाखल करण्यात आले. उपचारांपूर्वीच त्यांचा मृत्यू झाल्याचे डॉक्टरांनी सांगितले. अपघातानंतर पसार झालेल्या डंपरचालकाचा शोध घेण्यात येत असून, सहायक पोलीस निरीक्षक सुहास पाटील तपास करत आहेत.