पुणे : बँकेच्या चेअरमन, व्यवस्थापकीय संचालक व इतरांनी संगनमत करुन कंपनीच्या सहमतीविना परस्पर बनावट कर्ज खाते काढले. ते कंपनीचेच कर्ज खाते आहे असे भासवले. कंपनीने सुरक्षा म्हणून दिलेल्या धनादेशाद्वारे अडीच कोटी रुपयांची फसवणूक करण्याचा धक्कादायक प्रकार समोर आला आहे. याप्रकरणी सारस्वत बँकेच्या चेअरमन, व्यवस्थापकीय संचालक, झोनल व्यवस्थापकासह ८ जणांवर कोथरुड पोलिसांनी गुन्हा दाखल केला आहे. न्यायालयाच्या आदेशानुसार हा गुन्हा दाखल करण्यात आला आहे.
सारस्वत बँकेचे चेअरमन गौतम एकनाथ ठाकूर (रा. एकनाथ ठाकूर भवन, प्रभादेवी), व्यवस्थापकीय संचालक स्मिता एस संधाने, वसुली अधिकारी आनंद चाळके, झोनल व्यवस्थापक पल्लवी साळी (रा. चिंचवड), शाखा व्यवस्थापक अभिषेक भगत (रा. विश्रांतवाडी), झोनल व्यवस्थापक रत्नाकर प्रभाकर (रा. एरंडवणा) व इतर अशी गुन्हा दाखल केलेल्यांची नावे आहेत. याप्रकरणी स्मिता समीर पाटील (रा. कोथरुड) यांनी कोथरुड पोलिसांकडे फिर्याद दिली आहे. हा प्रकार २३ ऑगस्ट २०१८ ते १० जानेवारी २०२० दरम्यान घडला.
पोलिसांनी दिलेल्या माहितीनुसार, कंपनीने सारस्वत बँकेच्या विश्रांतवाडी शाखेतून साडेसोळा कोटी रुपयांचे कर्ज घेतले होते. त्यातील काही रक्कम कंपनीने फेडली. कर्ज थकल्याने बॅकेेने कंपनीचे आजी माजी संचालक व जामीनदार यांना २३ ऑगस्ट २०१८ रोजी १३ कोटी रुपयांचे वन टाईम सेटलमेंट प्रस्ताव दिला. कंपनीने तो मान्य करुन सुरक्षा म्हणून विना तारखेचे ६ धनादेश दिले होते. त्यातील तीन धनादेशावर एकूण अडीच कोटी रुपये एवढी रक्कम लिहून बँकेने ते पैसे कंपनीच्या खात्यातून काढून घेतले. दरम्यान, काही महिन्यांनंतर बँकेने वन टाईम सेटलमेंटचा प्रस्ताव अमान्य असल्याचे कळविले. तेव्हा कंपनीने चौकशी केल्यावर अडीच कोटी रुपये कंपनीच्या कर्ज खात्यात जमा न करता बँकेने परस्पर कंपनीच्या नावाने दुसरे बनावट खाते काढून त्यात हे धनादेश भरुन कंपनीची फसवणूक केली. फिर्यादीची कंपनी बँकेचे कर्ज रक्कम नियमित भरत असताना कर्ज रक्कम भरत नाही असे दाखवून कंपनीचे कर्ज खाती एनपीए झाल्याचे घोषित केले. फिर्यादी कंपनीच्या व आजी माजी संचालक व जामीनदार यांच्या वैयक्तिक मालकीच्या मालमत्ता जाणीवपूर्वक हडप करण्याचा प्रयत्न केला, असे फिर्यादीत म्हटले आहे. वरिष्ठ पोलीस निरीक्षक महेंद्र जगताप तपास करीत आहेत.