पुणे : अचानाक लिफ्ट बंद पडल्याने अडकून पडलेल्या रुग्ण महिला व चार पुरुषांना अग्निशमन दलाच्या जवानांनी सुखरुप बाहेर काढले. दुपारी बाराच्या सुमारास सातारा रस्त्यावरील आदिनाथ शाॅपिंग माॅलमधील लिफ्ट अचानक बंद पडली. त्यात नागरिक अडकून पडले. अग्निशमन दलाला याबाबतची माहिती मिळताच तात्काळ घटनास्थळी दाखल हाेऊन नागरिकांची सुटका करण्यात आली.
आदिनाथ शाॅपिंग माॅलच्या लिफ्टमध्ये एक रुग्ण महिला व चार पुरुष तासभर अडकून पडले हाेते. लिफ्टमन देखील नागरिकांसाेबत हाेता. तासभरानंतर बाहेर पडण्याचे अथक प्रयत्न केल्यानंतरही सुटका न झाल्याने लिफ्टमध्ये अडकलेल्या एका व्यक्तीने अग्निशमन दलाला फाेन करत सुटकेची मागणी केली. अग्निशमन मुख्यालयातील जवान घटनास्थळी लगेचच पोहोचले. लिफ्ट दुसऱ्या मजल्यावर मधोमध अडकली हाेती. यामधे एक रुग्ण महिला याच ठिकाणी एक्स-रे काढण्यासाठी आली होती. ते पाच ही जण घाबरलेले होते. जवानांनी त्यांना धीर देत लिफ्ट रुममधे प्रवेश करुन प्रयत्न केले व अवघ्या दहा मिनिटातच सर्व पाच जणांना सुखरुप बाहेर काढले. जवानांनी कर्तव्य बजावत केलेल्या कामाचे त्या पाच ही जणांनी आभार मानले.
या कामगिरीमधे प्र.अ. प्रदिप खेडेकर, वाहन चालक राजू शेलार, जवान छगन मोरे, शफिक सय्यद, मंगेश मिळवणे, रऊफ शेख, राजेश घडशी, विठ्ठल साबळे, दिक्षित, मेनसे, रणपिसे, तारु यांनी सहभाग घेतला.