भिगवण : येथील एका प्राथमिक शाळेतील शिक्षकाने सहावीतील अल्पवयीन विद्यार्थिनीशी अश्लील चाळे करून गैरवर्तन केल्याचा धक्कादायक प्रकार उघडकीस आला आहे. तर याच शिक्षकाने अनेकदा हा प्रकार करूनही शिक्षण विभागाने त्याला पाठीशी घातल्याची माहिती समोर आली आहे. या प्रकरणी मुलीच्या पालकांनी भिगवण पोलीस ठाण्यात तक्रार दिली असून भिगवण पोलिसांनी घटनेचे गांभीर्य ओळखून तातडीने पथक तयार करून आरोपीला अटक केली.
भिगवण परिसरातील जिल्हा परिषद प्राथमिक शाळेत हा घृणास्पद प्रकार घडला. ६ वी च्या वर्गात शिकणाऱ्या लहान मुलीला एकटीला वर्गात गाठून तिच्याशी अश्लील चाळे करत गैरप्रकार करण्याचा प्रयत्न केला. मात्र, चाणाक्ष मुलीने स्वत:ची सुटका करीत पळ काढला. घरी धाव घेत झालेल्या सर्व प्रकाराची माहिती आई-वडिलांना दिली. या घटनेमुळे पालक पुरते हादरून गेले आणि याची माहिती संबंधित शाळेतील प्रभारी मुख्याध्यापक यांना दिली. मात्र, शाळा प्रशासनाने चोवीस तास उलटूनही याची साधी चौकशी देखील केली नाही. त्यामुळे पालकवर्गात मोठा असंतोष पाहावयास मिळाला.
या घटनेची माहिती पालकांना समजताच त्यांनी शाळेत धाव घेत शिक्षकावर कारवाई करण्याची मागणी केली. यावेळी भिगवण पोलीस ठाण्याचे प्रभारी अधिकारी दिलीप पवार यांनी पोलीस पथकासह भेट देत पालकांना आरोपी विरोधात गुन्हा नोंद झाला असून आरोपीला अटक करण्यात आल्याची माहिती दिली. तसेच प्रभारी मुख्याध्यापक यांनी या प्रकाराची माहिती वरिष्ठांना दिली असून त्यांच्या सूचनेने पुढील कारवाई केली जाणार असल्याची माहिती दिली. तर या गंभीर प्रकारानंतरही गटशिक्षण अधिकारी यांनी दुसऱ्या दिवशी शाळेला भेट दिली.
गट शिक्षण अधिकारी अजिंक्य खरात यांनी या प्रकरणी चौकशी समिती नेमून आरोपी विरोधात कठोरात कठोर कारवाई करणार असल्याचे सांगितले. तसेच भिगवण पोलीस ठाण्याचे प्रभारी अधिकारी दिलीप पवार यांनी आरोपीला कठोरात कठोर शिक्षा व्हावी, यासाठी सक्षम तपास केला जाणार असल्याचे सांगितले.
विद्येच्या मंदिरात या विकृत शिक्षकाने यापूर्वीही असे प्रकार केल्याची माहिती मिळत आहे. तर ४ महिन्यांपूर्वी असाच प्रकार उघडकीस आला असताना शाळा प्रशासनाने माफीनामा लिहून घेत झाल्या प्रकारावर पडदा टाकण्याचे काम केले. दरम्यान इतर मुलींसोबत देखील असा विकृत प्रकार केल्याचे शाळेतील इतर मुलींनी बोलताना सांगितले.