Yogesh Tilekar ( Marathi News ) : भाजपचे विधान परिषद आमदार योगेश टिळेकर यांचे मामा सतीश सातबा वाघ (५८, रा. मांजरी) यांचे सोमवारी सकाळी मांजरी परिसरातून अपहरण करून निर्घृण खून करण्यात आला. अपहरण केल्यानंतर उरुळी कांचन पोलिस ठाण्याच्या कार्यक्षेत्रात सायंकाळी त्यांचा मृतदेह आढळला. त्यांच्या डोक्यावर धारदार शस्त्रांनी वार करण्यात आले होते. या घटनेला २४ तास उलटून गेल्यानंतरही अद्याप आरोपींचा शोध लागलेला नाही. मात्र पोलिस पूर्ण क्षमतेने आरोपींचा शोध घेण्याचा प्रयत्न करत असल्याची माहिती योगेश टिळेकर यांनी दिली आहे.
"काल माझ्या मामांचे अपहरण करून नंतर खून करण्यात आला. ही घटना घडल्यापासून पोलिस यंत्रणा अतिशय सक्षमपणे काम करत आहे आणि पोलिस लवकरच या प्रकरणाचा सुगावा लावतील. या घटनेनं माझ्या कुटुंबावर मोठा आघात झाला असून माझ्यासह आई आणि इतर सर्वजणच धक्क्यात आहेत," अशा शब्दांत योगेश टिळेकर यांनी आपल्या भावना मांडल्या आहेत.
मुख्यमंत्र्यांशी फोनवरून चर्चा
मामांच्या हत्येनंतर मुख्यमंत्र्यांशी फोनवरून चर्चा झाल्याची माहिती योगेश टिळेकर यांनी दिली आहे. "मुख्यमंत्री देवेंद्र फडणवीस यांच्यासह आमच्या पक्षाचे सर्वच वरिष्ठ नेते आणि उपमुख्यमंत्री अजित पवार यांनी फोन करून माझं सांत्वन केलं आणि पोलिस तपासाबाबत माहिती घेतली," असं टिळेकर यांनी सांगितलं आहे.
नेमकं काय घडलं?
सतीश वाघ हे नेहमीप्रमाणे मॉर्निंग वॉकसाठी घराबाहेर पडले होते. मांजरी परिसरातील एका हॉटेलजवळ सकाळी साडेसहाच्या सुमारास ते उभे होते. त्यावेळी पांढऱ्या रंगाच्या कारमधून अपहरणकर्ते तेथे आले. त्यांनी जबरदस्तीने वाघ यांना कारमध्ये बसवले. ही कार सोलापूरच्या दिशेने भरधाव निघून गेली. हा सर्व प्रकार हॉटेलच्या सीसीटीव्हीत कैद झाला. वाघ बराच वेळ झाले तरी घरी न परतल्याने कुटुंबीयांनी शोध सुरू केला. वाघ यांचा मोबाइल बंद असल्याचे त्यांच्या निदर्शनास आले. त्यांनी तातडीने पोलिसांशी संपर्क साधला. आमदार टिळेकर यांनी पोलिस आयुक्त अमितेश कुमार व अन्य वरिष्ठ अधिकाऱ्यांना ही बाब सांगितली. हडपसर पोलिस ठाण्याच्या पथकाने त्वरित वाघ यांचा शोध घेण्यास सुरुवात केली. या संपूर्ण भागातील सीसीटीव्ही फुटेजची पडताळणी करण्यात आली. त्यावेळी मांजरी परिसरातून वाघ यांचे अपहरण करण्यात आल्याचे स्पष्ट झाले. वाघ यांना घेऊन अपहरकर्ते सोलापूरच्या दिशेला गेल्याचे सीसीटीव्ही फुटेजवरून स्पष्ट झाले होते. हडपसर पोलिसांनी पुणे जिल्हा ग्रामीण पोलिस तसेच सोलापूर व अहिल्यानगर पोलिसांना माहिती दिली. वाहनाचे वर्णन कळवले. हडपसर पोलिस ठाण्यासह शहर पोलिस दलाची पाच पथके व शहर गुन्हे शाखेच्या पथकांनी तांत्रिक विश्लेषणाच्या साहाय्याने तपास सुरू केला. खुनाचे नेमके कारण समजलेले नाही. हल्लेखोरांच्या शोधासाठी पुणे, नगर व सोलापूर परिसरात पोलिसांची पथके पाठवण्यात आली. वाघ यांचे कोणाशी वाद होते का, त्यांना कोणी धमक्या दिल्या आहेत का? याबाबतची माहिती पोलिसांनी मिळवली आहे.