खड्डे खोदून पानटपऱ्यांमध्ये साठा

नशाबाजांना तल्लफ रोखता येईना, टपरीचालकांना पैसे कमविण्याचा मोह आवरेना अशी परिस्थिती सध्या शहरात सर्वत्र दिसून येत आहे. शासनाने गुटखा विक्रीवर बंदी

अमोल जायभाये/ जमीर सय्यद , पिंपरीनशाबाजांना तल्लफ रोखता येईना, टपरीचालकांना पैसे कमविण्याचा मोह आवरेना अशी परिस्थिती सध्या शहरात सर्वत्र दिसून येत आहे. शासनाने गुटखा विक्रीवर बंदी आणली असली तरी गुटखा खाणाऱ्यांवर त्याचा परिणाम झाला नाही. विक्रेत्यांनीही गुटखा विक्री थांबविली नाही. थोडी सावधगिरी बाळगून बंदी असूनही मोठ्या प्रमाणावर छुप्या पद्धतीने गुटखा विक्री होत आहे. पानटपऱ्यांमध्ये खड्डे खोदून गुटख्याचे साठे केले असल्याची खळबळजनक वस्तूस्थिती ‘लोकमत’ टीमने स्टिंग आॅपरेशनद्वारे चव्हाट्यावर आणली आहे.शहराच्या विविध भागांमध्ये असलेल्या पानाच्या टपऱ्या, छोटी हॉटेल, चहाची दुकाने येथे मोठ्या प्रमाणात गुटखा विक्री होत असल्याचे दिसून आले. राज्य शासनाने गुटख्यावर बंदी घातली असली तरी तस्करी करुन इतर राज्यातून मोठ्या प्रमाणात गुटख्याच्या पुड्या आणल्या जातात. याचे मोठे रॅकेटच तयार झाले आहे. बिजलीनगर, वाल्हेकरवाडी, आकुर्डी रेल्वे स्टेशन, काळेवाडी, पिंपरी, रहाटणी फाटा, चिंचवड स्टेशन, वाकडेवाडी, म्हाळसाकांत चौक, भोसरी चौक, चिखली, संत तुकाराम नगर पोलिस चौकी, यशवंतराव चव्हाण रुग्णालय, वल्लभनगर एसटी आगार या ठिकाणी अनेक टपऱ्यांवर ‘लोकमत’ प्रतिनिधीनी प्रत्यक्ष जाऊन पाहणी केली. नशाबाजांना गुटखा सहज मिळतो, कोठेही उपलब्ध होतो. मात्र, पोलिसांना आणि प्रशासनाला तो पकडता येत नाही. कारवाई करण्यासाठी गेलेल्या पथकाला १० ते २० पुड्या हाती लागतात. पानटपरी चालकांचे खड्डे खोदून केलेले साठे त्यांना दिसून येत नाहीत. काही ठिकाणी मोठे बॉक्स ठेवलेले असतात. तरी पोलिसांना काहीच सापडत नाही. याबद्दल आश्चर्य व्यक्त केले जात आहे. पानटपऱ्यांमध्ये खाली खोदाई करून केलेले गुटख्यांचे साठे याचाच शोध घेण्याचा प्रयत्न होणार का, असा प्रश्न उपस्थित होत आहे. पोलिसांची मर्जी राखली जात असल्याने टपरी चालकांकडे पोलीस दुर्लक्ष करत असल्याचे दिसून आले आहे. ओळखीच्या व्यक्तींना विक्रीअनेक ठिकाणचे टपरीमालक फक्त नियमित येणाऱ्या आणि ओळखीच्या ग्राहकालाच गुटख्याच्या पुड्या देतात. त्यांच्याकडे अनेकांचे उधारी खातेच असते. ओळखीच्या व्यक्तीला दिले तर कारवाई होण्याचा किंवा कोणाला कळण्याचा धोका राहत नाही. अनोळखी व्यक्तीला पुडी देण्याचे ते टाळतात. संत तुकाराम नगर पोलिस चौकी शेजारी असलेल्या एका टपरीवर गुटखा मिळतो. येथे एवढ्या जवळ पोलिस चौकी असून सुद्धा विक्री केली जात आहे. त्याकडे पोलिस दुर्लक्ष करत असल्याचे दिसते, तर यशवंतराव चव्हाण रुग्णालयाजवळ मोठ्या प्रमाणावर राजरोसपणे गुटखा विक्री होत आहे. लहान मुलांना वाईट सवय आकुर्डी रेल्वे स्टेशन जवळील एका पान टपरी शेटारी थांबलो होतो. तेथे एक १० ते १२ वर्षाची मुलगी आली तिने रुमाल पुढे केला. त्यामध्ये टपरीवाल्याने दोन पुड्या टाकल्या तिने रुमालाची घडी केली आणि तेथून धूम ठोकली. लहान मुलांकडून अशी कामे करून घेतली जात आहेत. माव्यालाही पसंतीकाही टपऱ्यांवर सुगंधी तंबाखू सुपारीत मिसळवून अनेक ग्राहकांना मावा दिला जातो. त्याचीही विक्री मोठ्या प्रमाणात होत आहे. मावा २० ते ३० रुपयाला विकला जातो.