"तुम्ही मेलात की तुमच्या बायको, पोरांना...", जयंत पाटलांना उत्तर देताना रुपाली ठोंबरेंचा तोल ढासळला

सुनेत्रा पवार यांच्यावर अजित पवारांच्या निधनानंतर चौथ्या दिवशीच उपमुख्यमंत्री पदाची शपथ घेतल्यावरून टीका झाली. शेकापचे जयंत पाटील यांनीही यावरून टीका केल्यानंतर रुपाली पाटील ठोंबर संतापल्या आणि बोलताना त्यांची जीभ घसरली.

'उपमुख्यमंत्री पदाचा शपथविधी १५ दिवसांनी घेतला असता, तर काय बिघडले असते', अशी टीका शेतकरी कामगार पक्षाचे नेते जयंत पाटील यांनी केली. त्यांच्या या विधानावर रुपाली पाटील ठोंबरे यांनी संताप व्यक्त केला. त्या म्हणाल्या की, 'तुम्ही मेल्यानंतर तुमच्या बायको आणि मुलांना सांगा की, तुम्ही मेल्यावर कुठलेही काम करायचं नाही.'

'माझा त्यांना एक फुकटचा सल्ला'

रुपाली पाटील ठोंबरे म्हणाल्या, "राजमाता जिजाऊ, अहिल्यादेवी होळकर, ताराराणी बाईसाहेब, झाशीची राणी यांच्या महाराष्ट्रामध्ये जयंत पाटील असे बोलणार असतील, तर त्यांना माझा एक फुकटचा सल्ला आहे."

"तुम्ही तुमच्या घरातील बायकांना आणि पोरांना एक नियमावली लिहून द्या की, तुम्ही मेले की १० दिवस किंवा वर्षभर कोणतेही कार्य करायचे नाही. हे स्वातंत्र्य तुम्हाला आहे", असे विधान रुपाली ठोंबरेंनी केले. 

'जयंत पाटलांनी मळमळ ओकू नये'

"सुनेत्रा वहिनींबद्दल बोलायचा तुम्हाला अधिकारी तुम्हाला नाही. जयंत पाटील यांचे वक्तव्य गुळसट असून, जयंत पाटील आता शून्य झाले आहेत. जयंत पाटील यांच्या सल्ल्याची महाराष्ट्राला आणि महाराष्ट्रातील महिलांना गरज नाही. त्यांची तेवढी पातळी देखील नाही. जयंत पाटील यांनी आपली मळमळ ओकू नये", अशी टीका रुपाली ठोंबरे यांनी केली. 

अमोल मिटकरीही जयंत पाटलांवर भडकले

आमदार अमोल मिटकरींनीही जयंत पाटलांवर निशाणा साधला. मिटकरी म्हणाले, "विधान परिषदेत मी या व्यक्तीचा प्रचंड आदर करायचो. शेकापची पुरोगामी विचारसरणी यामुळे मी सुरुवात पासून प्रभावित आहे. सभागृहातील भाईंची अभ्यासपूर्ण मांडणी मला नेहमी प्रभावित करत राहिली."

"आज ते सभागृहाचे सदस्य म्हणून नाहीत याची नेहमी खंत वाटायची. आपल्या आयुष्याची सर्व अभ्यासपूर्ण हयात पहिल्या महिला उपमुख्यमंत्री झालेल्या सुनेत्रावाहिनींच्या शपथविधी संदर्भात केलेलं वक्तव्य व बुरसटलेल्या विचारधारेची मांडणी, यामुळे या व्यक्तीबद्दल आता घृणा यायला लागली आहे. त्यांची अहंकारी व उन्मत्त भाषा शेकाप पक्षाच्या विचाराला हरताळ फासणारी ठरली", अशी टीका आमदार मिटकरींनी जयंत पाटलांवर केली.