पुणे : वादग्रस्त माजी आयएएस अधिकारी पूजा खेडकर हीचे वडील दिलीप खेडकर यांच्याविरोधात पुणे पोलिसांकडे कामात अडथळा आणल्याप्रकरणी तक्रार नाेंदवण्यात आली आहे. जिल्हाधिकारी कार्यालयातील तहसीलदार दिलीप आकडे यांनी बंडगार्डन पोलिस ठाण्यात २ पानी तक्रार अर्ज दिल्यामुळे दिलीप खेडकर पुन्हा अडचणीत येणार आहेत. पुणे पोलिसांकडून या अर्जाची चौकशी सुरू केली असून, त्यानुसार पुढील कारवाई केली जाणार आहे, असे वरिष्ठ पोलिस अधिकाऱ्यांकडून सांगण्यात आले आहे.
आयएएस प्रशिक्षणार्थी म्हणून पूजा खेडकर हिची पुण्यातील जिल्हाधिकारी कार्यालयात बदली झाली होती. यादरम्यान तिने स्वतंत्र केबिन, शिपायांची मागणी केली, तसेच खासगी गाडीवर अंबर दिवा लावल्याने ती वादग्रस्त ठरली. पूजासह तिच्या वडिलांनी जिल्हाधिकारी कार्यालयात येऊन पूजाला सुविधा द्यावी यासाठी जिल्हाधिकारी कार्यालयातील कर्मचाऱ्यांवर दबाव आणला होता. याबाबत जिल्हाधिकारी डाॅ. सुहास दिवसे यांनी शासनाला एक अहवाल सादर केला होता. त्यापूर्वी प्रशिक्षणार्थी अधिकाऱ्यांना स्वतंत्र दालन, शिपाई किंवा इतर गोष्टी नसतात. मात्र, पूजा खेडकर हिने यासाठी आग्रह धरला होता.
दरम्यान, याप्रकरणी तहसीलदार दिलीप आकडे यांनी कामात अडथळा आणला असल्याचा तक्रार अर्ज बंड गार्डन पोलिसांकडे दिला आहे. त्या अर्जाची चौकशी सुरू केली असून, संबंधित तहसीलदारांना जबाबासाठी बोलावण्यात आले होते. मात्र, ते आज येऊ शकले नाहीत, अशी माहिती पोलिसांकडून देण्यात आली आहे.