पुणे : शहरातील खुनाचा प्रयत्न, शरीराविरुद्धचे गुन्हे, जबरी चोरी, सोनसाखळी चोरी, घरफोड्या, वाहनचोरी यांच्या संख्येत घट होत असतानाच आर्थिक गुन्हे आणि सायबरचोरीच्या गुन्ह्यांमध्ये वाढ झालेली दिसून येत आहे़. त्यामुळे शहरातील व्हाईट कॉलर गुन्हेगारीत वाढ होत असल्याचे चित्र २०१९ मध्ये शहरात दाखल झालेल्या गुन्ह्यांमधून दिसून येत आहे. पोलीस आयुक्त डॉ़. के़. व्यंकटेशम यांनी २०१९ मध्ये शहरात घडलेल्या गुन्ह्यांचा आढावा घेतला. यावेळी सहआयुक्त डॉ़. रवींद्र शिसवे, अतिरिक्त पोलीस आयुक्त अशोक मोराळे, डॉ़. संजय शिंदे, पोलीस उपायुक्त बच्चनसिंह, मितेश गिट्टे आदि उपस्थित होते़.२०१८ च्या तुलनेत फक्त खुनाच्या गुन्ह्यात २ ने वाढ झाली असून सर्व गुन्ह्यांमध्ये ८७९ ने गुन्हे घटले आहेत. महिलांवरील अत्याचारातील विनयभंगाच्या गुन्ह्यात १९ टक्के तर, बलात्काराच्या घटनांमध्ये ६ टक्क्यांनी घट झाली आहे़. सोनसाखळी चोरीच्या घटनांमध्ये ११४ गुन्हे कमी झाले आहेत. वाहनचोरीच्या गुन्ह्यात २९० गुन्ह्यांनी घट झाली आहे़. मालमत्तेचे गुन्हे ६८२ ने कमी झाले आहेत.
पोलीस दलाच्या वतीने राबविलेले गुन्हेगारांवर ‘वॉच’ ठेवणारा ‘स्क्रिप’ उपक्रम, गस्त, प्रतिबंधात्मक कारवाई अशा अनेक बाबींमुळे गुन्ह्यांची संख्या कमी झाली़. पुणे अमली पदार्थ मुक्त करण्याचा निर्धार आहे़. प्राणघातक अपघातांची संख्या कमी झाली असली तर ती पोलिसांच्या कारवाईमुळे नाही़ तर त्याला अनेक कारणे आहेत. पुढील वर्षात वाहतूक सुरक्षित आणि सुरळीत ठेवण्याकडे अधिक लक्ष देणार आहोत.डॉ. के़. व्यंकटेशम, पोलीस आयुक्त.
...........