बारामती: एखादे काम होणारे असेल तर ते तातडीने पूर्णत्वाला नेण्यात उपमुख्यमंत्री अजित पवार यांचा हातखंडा आहे. याची प्रचिती रविवारी साताऱ्यात फलटण येथील ११ निवृत्त शिक्षकांना आली. नेहमीप्रमाणे रविवारी सकाळी बारामती येथे उपमुख्यमंत्री अजित पवार यांचा जनता दरबार सुरू होता. यावेळी फलटण तालुक्यातील निवृत्त शिक्षकांनी जमिन फसवणुकीबाबतची तक्रार पवार यांच्या कानी घातली. पवार यांच्या सुचनेनुसार बारामती शहर पोलिसांनी या प्रकरणाचा तपास करून रविवारी रात्रीच या शिक्षकांची हक्काची जमिन परत मिळवून दिली.
फलटण तालुक्यातील ११ शिक्षकांनी निवृत्त झाल्यावर सर्व मिळालेली आयुष्यभरची रक्कम खर्च करून बारामती शहरातील खंडोबा नगर येथे ग्रुप मध्ये ६० गुंठे जागा विकत घेतली होती. चांगला भाव विकताना येत असल्याने त्यातील ४० गुंठे जागा शहरातील नामांकित 'तीन एजंट' च्या माध्यमातून विकली. त्या तिघांनी कमिशन तर कमावले. व त्याच बरोबर फलटण ग्रुपचा विश्वास संपादित केला. त्यामुळे फलटण शिक्षक ग्रुप त्या तिघांवर खुश होता.
आता राहिलेल्या वीस गुंठे विकण्याची जवाबदारी सुद्धा त्या तिघांवर टाकली. विश्वास संपादित केलेले तिघांनी २० गुंठे विकली व त्यातील फक्त १४ लाख रुपये दिले व राहिलेले १ कोटी २८ लाख ५० हजार उद्या देऊ. आज कायम खुश खरेदी (दस्त नोंदणी ) करून द्या, असे विश्वासाने सांगितले. पहिला व्यवहार उत्तम झाल्याने फलटण शिक्षक ग्रुप ने कायम खुश खरेदी करून दिले. परंतु काही तासातच त्या तिघांनी पलटी मारून आता राहिलेली रक्कम देत नसल्याचे सांगून काय करायचे ते करा , बारामती मध्ये आमचे कोण वाकडे करू शकणार नाही. अशी भूमिका घेतली. फलटण शिक्षक ग्रुप ने विनंती करूनही ते रक्कम आणि जमीन परत देण्यास तयार नव्हते.
अजित पवार यांच्या कानी तक्रार पडताच दिल्या पोलिसांना चौकशीच्या सूचना
रविवारी सकाळी उपमुख्यमंत्री अजित पवार यांच्या जनता दरबारात यातील काही शिक्षकांनी व्यथा मांडून न्याय मिळावा अशी अपेक्षा व्यक्त केली. पवार यांनी त्वरित येथे उपस्थित असलेले अतिरिक्त पोलीस अधीक्षक मिलिंद मोहिते यांना या प्रकरणात दोन्ही बाजू व सत्यता पाहून गुन्हेगार असतील त्यांना सदर रक्कम देऊन टाकण्यास सांगा अशी सूचना केली. तिघांना पोलीस ठाण्यामध्ये आणून चौकशी केली. परंतु प्रतिसाद देत नसल्याने पोलीस खाक्या दाखवताच फसवणूक केल्याची कबुली त्यांनी दिली.