चाकण - शिक्रापूर रस्त्यावर कंटेनरच्या धडकेत दुचाकीचालकाचा मृत्यू, पत्नी गंभीर जखमी

मुख्य चौकात रस्ता ओलांडताना शिक्रापूर बाजूकडून भरधाव आलेल्या कंटेनरने दुचाकीस धडक दिली

शेलपिंपळगाव : चाकण - शिक्रापूर रस्त्यावरील  शेलपिंपळगाव (ता. खेड) येथील मुख्य चौकात कंटेनरच्या धडकेत दुचाकीचालक गंभीर जखमी होऊन मृत्यू  झाला. तर दुचाकीवर पाठीमागे बसलेली महिला गंभीर जखमी झाली आहे.              पोलिसांनी दिलेल्या माहितीनुसार ही घटना गुरुवारी (दि.११) सायंकाळी चारच्या सुमारास चाकण शिक्रापूर हायवे रस्त्यावरील शेलपिंपळगाव - दौंडकरवाडी चौकात घडला. बाळासाहेब थोरवे त्यांच्या पत्नीसह दुचाकीने प्रवास करत होते. दरम्यान शेलपिंपळगाव येथील मुख्य चौकात रस्ता ओलांडताना शिक्रापूर बाजूकडून भरधाव आलेल्या कंटेनरने दुचाकीस धडक दिली. अपघातात थोरवे दांपत्याला गंभीर दुखापत झाली. यामध्ये बाळासाहेब बंडू थोरवे (वय ६० वर्षे रा. शेलपिंपळगाव ता. खेड) यांचा मृत्यू झाला. तर त्यांच्या पत्नी शारदाबाई बाळासाहेब थोरवे गंभीर जखमी झाल्या आहेत.             याप्रकरणी शिवाजी बंडू थोरवे यांनी चाकण पोलिसांत दिलेल्या फिर्यादीवरून कंटेनर चालक अवदेश कुमार अरुण वर्मा (रा. खाजूवान, खरारी मध्यप्रदेश) याच्यावर गुन्हा दाखल करण्यात आला आहे. मात्र कंटेनर चालकास अद्याप अटक करण्यात आलेली नाही. दरम्यान रस्त्यावरील अपघातामुळे वाहतुकीस अडथळा निर्माण होऊन दुतर्फा सहा - सात किलोमीटर वाहनांच्या रांगा लागल्या होत्या. रात्री उशिरा पोलिसांच्या मदतीने वाहतूक सुरळीत झाली.