NCP Sunetra Pawar ( Marathi News ) : राज्यातील बहुचर्चित बारामती लोकसभा मतदारसंघातून अखेर महायुतीकडून उपमुख्यमंत्री अजित पवार यांच्या पत्नी सुनेत्रा पवार या निवडणूक रिंगणात असणार, हे आता स्पष्ट झालं आहे. राष्ट्रवादी काँग्रेसचे प्रदेशाध्यक्ष सुनील तटकरे यांनी काही वेळापूर्वी सुनेत्रा पवार यांच्या उमेदवारीची घोषणा केली. महाविकास आघाडीकडून बारामतीसाठीसुप्रिया सुळे यांच्या नावाचीही आजच अधिकृतरित्या घोषणा झाली आहे. त्यामुळे बारामतीत नणंद विरुद्ध भावजय अशी लढत पाहायला मिळणार आहे. उमेदवारीची घोषणा होताच सुनेत्रा पवार यांनी महायुतीच्या सर्व नेत्यांचे आभार मानले आहेत. तसंच सुप्रिया सुळेंनाही आव्हान दिलं आहे.
सुनील तटकरे यांच्याकडून उमेदवारीची घोषणा करण्यात आल्यानंतर प्रतिक्रिया देताना सुनेत्रा पवार म्हणाल्या की, "आजचा दिवस माझ्या आयुष्यातील सर्वांत भाग्याचा दिवस आहे. कारण आज महायुतीच्या माध्यमातून मला बारामती लोकसभा मतदारसंघातून निवडणूक लढवण्याची संधी मिळाली आहे. मला ही संधी दिली त्याबद्दल मी पंतप्रधान नरेंद्र मोदी, गृहमंत्री अमित शाह, राष्ट्रवादीचे राष्ट्रीय अध्यक्ष अजित पवार, प्रदेशाध्यक्ष सुनील तटकरे, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, भाजप प्रदेशाध्यक्ष चंद्रशेखर बावनकुळे, रासपचे महादेव जानकर या सर्वांचेच आभार मानते," असं सुनेत्रा पवार यांनी म्हटलं आहे.
सुप्रिया सुळेंबाबत काय म्हणाल्या?
बारामती लोकसभा मतदारसंघाच्या विद्यमान खासदार सुप्रिया सुळे या राष्ट्रवादी शरदचंद्र पवार पक्षाच्या तिकिटावर महाविकास आघाडीकडून निवडणूक रिंगणात आहेत. सुप्रिया सुळे यांच्या आव्हानाविषयी प्रश्न विचारताच सुनेत्रा पवार यांनी म्हटलं की, "ही निवडणूक जनतेनं हातात घेतली आहे. त्यामुळे ही जनतेची लढत आहे," असं म्हणत त्यांनी सुप्रिया सुळेंना आव्हान दिलं आहे.
दरम्यान, शिवसेना नेते आणि माजी मंत्री विजय शिवतारे यांच्या रुपाने महायुतीत बंडाळी निर्माण झाली होती. शिवतारे यांनी अपक्ष उमेदवार म्हणून निवडणूक लढवण्याचा निर्णय घेतला होता. मात्र त्यांची समजूत काढण्यात महायुतीच्या सर्व नेत्यांना यश आले आणि आज दुपारीच पत्रकार परिषद घेत विजय शिवतारेंनी आपण निवडणुकीतून माघार घेत असल्याचे जाहीर केले. तसंच आपण या निवडणुकीत सुनेत्रा पवार यांना पाठिंबा देणार असल्याचंही शिवतारे यांनी सांगितलं. त्यानंतर काही तासांतच राष्ट्रवादीकडून सुनेत्रा पवार यांची उमेदवारी जाहीर करण्यात आली आहे.