पुणे : मित्राचा खून केल्याचा राग मनात धरत तरुणावर गोळी झाडून जीवे मारण्याचा प्रयत्न केल्याप्रकरणी पाच जणांवर उत्तमनगर पोलीस स्टेशनमध्ये गुन्हा दाखल करण्यात आला आहे.
याप्रकरणी वारजे माळवाडी भागात राहणाऱ्या २४ वर्षीय तरुणाने फिर्याद दिली आहे. ही घटना ८ ऑगस्ट रोजी रात्री पावणेदहाच्या सुमारास शिवणे स्मशानभूमी ते एनडीए रोड दरम्यान घडली. फिर्यादी व त्याचा मित्र कारमधून जात होते. आरोपींच्या मित्राचा खून फिर्यादीच्या मित्राने केल्याचा राग मनात धरून आरोपींनी मोटारसायकलवरून फिर्यादी यांच्या कारचा पाठलाग केला. आरोपींनी आरडाओरडा करून फिर्यादी आणि त्याच्या मित्राला जीवे मारण्याच्या उद्देशाने त्यांच्यावर गोळीबार केला. त्यातील एक गोळी फिर्यादी यांच्या पाठीला लागल्याने तो गंभीर जखमी झाला. तसेच रस्त्यावरील लोकांना पळवून लावत आरोपींनी दहशत निर्माण करण्याचा प्रयत्न केल्याने त्यांच्यावर गुन्हा दाखल करण्यात आला आहे. सहायक पोलीस निरीक्षक वाघमारे पुढील तपास करीत आहेत.