पुणे : आंबे विकत देण्याच्या बहाण्याने घरी बोलावून लग्नाचे आमिष दाखवून तरुणीशी शारीरिक संबंध ठेवले. या शारीरिक संबंधाचा व्हिडीओ बनवून तो व्हायरल करण्याची धमकी देऊन, या तरुणीवर वारंवार अत्याचार केल्याचा धक्कादायक प्रकार समोर आला आहे.
या प्रकरणी एका २८ वर्षांच्या तरुणीने येरवडा पोलीस ठाण्यात फिर्याद दिली आहे. त्यानुसार, पोलिसांनी अनिकेत ईश्वर भटेवारा (वय २६, रा.प्रिनस्टन टाऊन सोसायटी, कल्याणीनगर) याच्यावर गुन्हा दाखल केला आहे. हा प्रकार आरोपीचे घरी, तसेच वेगवेगळ्या हॉटेल रूममध्ये ९ एप्रिल, २०२१ ते ९ एप्रिल, २०२२ दरम्यान घडला.
आरोपी आणि फिर्यादी हे एकमेकांच्या ओळखीचे आहेत. अनिकेत भटेवारा याने फिर्यादी तरुणीला आंबे विकत देण्याच्या कारणाने घरी बोलावून घेतले. घरात कोणी नसताना त्याने मी तुझ्याशी लग्न करणार आहे, असे म्हणून लग्नाचे आमिष दाखवून फिर्यादी यांच्याशी जबरदस्तीने शारीरिक संबंध ठेवले. या शारीरिक संबंधाचे व्हिडीओ मोबाइलमध्ये शूट केले. हे फोटो व व्हिडीओ व्हायरल करेन, अशी धमकी देऊन, फिर्यादी यांना वेगवेगळ्या हॉटेलमध्ये बोलावून त्यांच्याशी जबरदस्तीने शारीरिक संबंध केला.