पुणे : शहराच्या प्रशासनात शिक्षण मंडळ, वृक्ष प्राधिकरण समिती, पीएमपीएमएल समिती, जिल्हा नियोजन आदी विविध महत्त्वाच्या समित्या कार्यरत असतात. मात्र, महाराष्ट्राची सांस्कृतिक राजधानी म्हणून ओळख असलेल्या पुणे शहरातील महापालिकेत आतापर्यंत स्वतंत्र सांस्कृतिक समिती अस्तित्वात नाही. महापालिकेत स्वतंत्र सांस्कृतिक समितीची स्थापना करण्यात यावी, अशी मागणी सांस्कृतिक क्षेत्रातून जोर धरत आहे.
पुणे शहर हे केवळ शैक्षणिक किंवा औद्योगिक नव्हे, तर ऐतिहासिक, सांस्कृतिक आणि कलात्मक वारसाचे केंद्र आहे. पुण्याने महाराष्ट्राला आणि देशाला अनेक दिग्गज कलाकार दिले आहेत. नाट्य, चित्रपट, संगीत आणि साहित्य क्षेत्रातील अनेक कलाकार पुण्यात घडले, वाढले आणि आजही येथे वास्तव्य करीत आहेत. या शहरातील नाट्यगृहे, सांस्कृतिक केंद्रे, संगीत-नृत्य परंपरा, उत्सव-कार्यक्रम आणि कलाकारांचे प्रश्न यांचा योग्य विचार आणि संवर्धन करण्यासाठी महानगरपालिकेत स्वतंत्र सांस्कृतिक समिती असणे अत्यावश्यक आहे. आजच्या घडीला मुंबईप्रमाणेच पुणे शहरातही मोठ्या प्रमाणावर चित्रपट, वेब सिरीज, मालिका आणि जाहिरातींचे शूटिंग होत आहे. या शूटिंगसाठी आवश्यक असलेल्या परवानग्या, नियोजन, कलाकार आणि तंत्रज्ञांना सुविधा मिळाव्यात यासाठी देखील महानगरपालिकेत सांस्कृतिक समिती असणे काळाची गरज असल्याचे सांस्कृतिक विश्वाचे म्हणणे आहे.
पुण्यात गेल्या ७५ वर्षांत पुणे शहराने असंख्य नामवंत मराठी कलाकार, साहित्यिक, रंगकर्मी घडवले. महाराष्ट्रातील कोणत्याही महानगरपालिकेकडे नसतील एवढी नाट्यगृहे पुणे महानगरपालिकेकडे आहेत; मात्र ही वस्तुस्थिती असताना देखील आजपर्यंत पुणे महानगरपालिकेत स्वतंत्र सांस्कृतिक समिती स्थापन करण्यात आलेली नाही, ही अत्यंत दुर्दैवी आणि गंभीर बाब आहे. शहराच्या सांस्कृतिक वारशाचे जतन, संवर्धन आणि कलाकारांच्या प्रश्नांना न्याय देण्यासाठी स्वतंत्र सांस्कृतिक समितीची स्थापना करणे ही काळाची गरज आहे- बाबासाहेब पाटील, प्रदेशाध्यक्ष, राष्ट्रवादी चित्रपट व सांस्कृतिक विभाग,
पुण्यात महापालिकेतर्फे महोत्सव, पुरस्कारांचे कार्यक्रम व्हायचे. पण आता काहीही होत नाही. पुण्यातील कलाकारांना व्यासपीठ मिळायला हवे. नृत्यात्मक कार्यक्रमांसाठी स्वतंत्र थिएटर असावे. सांस्कृतिक समिती सर्व कलांसह साहित्यिक, रंगकर्मी यांना सामावून घेणारी हवी- निकिता मोघे, प्रसिद्ध नृत्यदिग्दर्शिका