पुणे : शहरात गेल्या काही दिवसांमध्ये अल्पवयीन मुलींवर अत्याचार झाल्याच्या दोन घटना उघडकीस आल्या असून, या दोन्ही घटना पुणे स्टेशन परिसरात घडल्या आहेत. त्यामुळे, पुणे स्टेशनबरोबरच शहरातील अन्य बसस्थानके, मध्यवर्ती बाजारपेठा, महत्त्वाचे चौक अशा गजबजलेल्या ठिकाणांवर पोलीस बंदोबस्त वाढावा तसेच पोलीस गस्त वाढवावी, अशी मागणी शहर राष्ट्रवादी काँग्रेसच्या वतीने करण्यात आली आहे़
पक्षाचे शहराध्यक्ष प्रशांत जगताप, महिला प्रदेशाध्यक्षा रूपाली चाकणकर, नगरसेविका नंदा लोणकर यांनी नुकतीच पुणे शहराचे पोलीस आयुक्त अमिताभ गुप्ता यांची भेट घेऊन याबाबतचे निवेदन दिले आहे़
पोलीस बंदोबस्त वाढवितानाच अशा घटनांना रोखण्यासाठी कडक उपाययोजना करावी व यामध्ये स्थानिक नागरिकांची मदत घ्यावी, असे शहर राष्ट्रवादी काँग्रेसने आपल्या निवेदनात नमूद केले आहे़ आजमितीला कोरोनाच्या दुसऱ्या लाटेतून शहर सावरत असताना आणि सामान्य नागरिक सण-उत्सवांची तयारी करत असतानाच या दोन्ही घटना घडल्या आहेत़ या दोन्ही घटनांमध्ये आरोपींनी अतिशय घृणास्पद कृत्य केले. त्यामुळे, प्रत्येक संवेदनशील व्यक्ती अस्वस्थ झाली आहे. या दोन्ही प्रकरणांमध्ये पुणे पोलिसांनी तातडीने छडा लावला आणि आरोपींना बेड्या ठोकल्या, ही त्यामध्ये सर्वांसाठीच दिलासा देणारी गोष्ट आहे. परंतु, देशामध्ये सांस्कृतिक, शैक्षणिक आणि नव्या पिढीच्या आकांक्षांना वाव देणारे शहर म्हणून ओळख असणाऱ्या पुण्यामध्ये अशा घटना घडणे शहरासाठी अजिबात भूषणावह नाही. असे प्रकारच बंद व्हायला हवेत आणि आरोपींच्या मनामध्ये पोलिसांविषयी जरब बसायला हवी, अशी सर्वसामान्यांची भावना असल्याचे निवेदनात नमूद करण्यात आले आहे़
--------------------
फोटो मेल केला आहे़