पुणे : उपमुख्यमंत्री अजित पवार यांच्या पार्थिवावर अंत्यसंस्कार गुरुवारी करण्यात येणार होते. या अंत्यसंस्कारासाठी केंद्रीय गृहमंत्री अमित शहा यांच्यापासून विविध राज्यातील मंत्री, महाराष्ट्राचे जवळपास सर्व मंत्रिमंडळ त्याचबरोबर आमदार, खासदार आणि लाखोंचा जनसमुदाय उपस्थित राहणार असल्याने पुणे ग्रामीण पोलिस दलावर बंदोबस्ताची मोठी जबाबदारी येऊन पडली होती.
पुणे, पिंपरी-चिंचवड पोलिस आयुक्तालयासह होमगार्ड, राज्य राखीव पोलिस दल यांच्यासह अन्य पोलिस दलांतील ११ हजार पोलिस अधिकारी कर्मचारी यांच्या मदतीने ग्रामीण पोलिसांनी ही जबाबदारी यशस्वीपणे पार पडली. २४ तासांच्या आत महाराष्ट्र पोलिसांनी समन्वयातून हा प्रचंड मोठा बंदोबस्त पार पाडला.
पोलिस महासंचालक सदानंद दाते, पोलिस आयुक्त अमितेश कुमार, विनयकुमार चौबे, विशेष पोलिस महानिरीक्षक सुनील फुलारी यांच्यासह अनेक वरिष्ठ पोलिस अधिकारी जातीने या संपूर्ण बंदोबस्तावर लक्ष ठेवून होते. उपमुख्यमंत्री अजित पवार यांचे विमान अपघातात निधन झाल्याचे समजल्यानंतर संपूर्ण राज्यातून त्यांचे चाहते, समर्थक मोठ्या संख्येने बारामतीकडे येऊ लागले होते. अचानक उद्भवलेल्या या परिस्थितीला तोंड देण्यासाठी सर्वच पोलिस सज्ज झाले. पोलिस महासंचालक सदानंद दाते हे स्वत: संपूर्ण परिस्थितीवर लक्ष ठेवून होते.
बारामतीमध्ये येणारे लाखो समर्थक, चाहते तसेच असंख्य मान्यवर यांची येणारी वाहने, त्यांना विद्या प्रतिष्ठान येथील अंत्यसंस्काराच्या ठिकाणी जाण्यासाठी रस्ता मोकळा ठेवणे़ त्याचवेळी सर्वसामान्यांना तेथे जाण्यासाठी कोणताही त्रास होऊ नये, अशी सर्व व्यवस्था करण्याची मोठी जबाबदारी होती. त्याचवेळी हा दु:खद प्रसंग असल्याने येणाऱ्या लोकांना नेहमीचा पोलिसी खाक्या न दाखवता संपूर्ण गर्दीचे व्यवस्थापन करण्याची मोठी जबाबदारी होती.
यासाठी पुणे शहर पोलिस दलातील पोलिस आयुक्त, अपर पोलिस आयुक्त, पोलिस उपायुक्त, सहायक पोलिस आयुक्त, पोलिस निरीक्षक, अंमलदार असा सुमारे ८०० जणांचा बंदोबस्त नेमण्यात आला होता.
पिंपरी-चिंचवड पोलिस दलातील पोलिस आयुक्त, २ पोलिस उपायुक्त, २ सहायक पोलिस आयुक्त, १० पोलिस निरीक्षक, २३ सहायक पोलिस निरीक्षक, उपनिरीक्षक व अंमलदार असा ४५० जणांचा फौजफाटा नेमण्यात आला होता. याशिवाय ठाणे, नवी मुंबई, सातारा, कोल्हापूर, सांगली येथील पोलिस फौजफाटा बंदोबस्ताला मागविण्यात आला होता़.
याशिवाय बारामतीकडे येणाऱ्या-जाणाऱ्या सर्व रस्त्यांवर कोठेही वाहतूककोंडी होऊ नये, यासाठी लगतच्या सर्व जिल्ह्यांमधील महामार्गावर वाहतूक विभागाचा बंदोबस्त ठेवण्यात आला होता. अनेक पोलिस अधिकारी, पोलिस अंमलदार हे गेल्या २४ तासांपासून रात्रभर या संपूर्ण बंदोबस्ताची आखणी करीत होते. अशा प्रसंगी इतका मोठा बंदोबस्त करण्याचे नियोजन ग्रामीण पोलिस दलाने यशस्वी केले.
Web Summary : Maharashtra Police mobilized 11,000 personnel for Ajit Pawar's funeral. High-profile attendees and a large public gathering necessitated extensive security measures. Senior officers oversaw traffic management and crowd control, ensuring smooth proceedings across Baramati.
Web Summary : अजित पवार के अंतिम संस्कार के लिए महाराष्ट्र पुलिस ने 11,000 कर्मियों को तैनात किया। बड़ी संख्या में गणमान्य व्यक्तियों और जनता की उपस्थिति के कारण सुरक्षा व्यवस्था कड़ी रही। वरिष्ठ अधिकारियों ने यातायात और भीड़ नियंत्रण का निरीक्षण किया।